كانت هتفرق
مجموعة من الكتاب المعاصرين
كانت هتفرق كتاب بيضم 10 قصص فازت في مسابقة القصة القصيرة لـ iRead AWARDS . بيتكلموا فيه عن معضلة ظهور الشخص الصح في الوقت الغلط والعكس، حكايات وتفاصيل رومانسية وإنسانية. قصص هتأكدلك أن كل قرار وكل لحظة وكل كلمة "كانت هتفرق" فعلاً
احصل علي نسخةنبذة عن كانت هتفرق
في التمنيات ظهر ألبوم شبابيك لمغني جديد اسمه “محمد منير” وكان فيه أغنية بنفس اسم الألبوم، بتقول إيه بقي “شبابيك.. الدنيا كلها شبابيك، والسهر والحكاية والحواديت كلها دايرة عليك”
للوهلة الأولى من سماعك للأغنية بتتفتح صناديق الذكريات جوا دماغك بتفتكر لحظة أول مرة سمعتها وشاركتها مع مين، الشاعر مجدي نجيب عبقري؛ لأنه جمع بين الحب والشجن والقسوة لما قال “واللي كان خايف عليك انتهى من بين إيديك” ودا بيوصف نفس الاحساس لما قرأت كتاب ” كانت هتفرق”
الحكايات اللي جوا الكتاب بتعبر عننا من أول فتح عبدالحميد للمقبرة والقط نسكافيه وهلوسة أحمد باشا عبد العظيم ولحد البقلاوة وإيه اللي حصل في يوم الخميس، وهتسأل نفسك في حكاية فرح “ماذا يفعل المرء عندما يقع في حب غيمة؟ وهل فعلاً هتعرف تفتح صفحة جديدة مع نفسك في “قلب نابض” وحكاية آدم مع العرائس الماريونيت في “كابتولينا” وهسيبك تكتشف رقصة التعساء، هتحس إنك مش بس عايش جوا الحدوتة لا أنت الحدوتة نفسها بكل تفاصيلك واختياراتك، بتقابل ناس صح في وقت غلط والعكس، هل فعلاً لو قدرت ترجع بالزمن هتقدر تغير حاجة ولا هتتقبل الواقع زي ما هو وتختار نفسك اختياراتك تاني؟
في النهاية كتاب “كانت هتفرق” توليفة جديدة من كُتاب شباب بروح جديدة وحب وشغف للكتابة كتبوا 10 قصص بحواديت مختلفة بتناقش تفاصيل إنسانية ورومانسية، وهي الحياة أية غير حواديت وبنعشها؟!
هنستناك تقرأ كانت هتفرق وتقولنا أي قصة فيهم بتعبر عنك؟
