ليالي الكورونا

نبذة عن ليالي الكورونا

افتكر زمان والدي كان عنده عربية لادا صغيرة، والكاسيت هو مصدر سماع الأغاني فيها، كان فيها شرايط أغاني الفنانة الجميلة وردة الجزائرية، لافت انتباهي أغنية “ليالينا” شغلتها وكنت أول مرة أسمعها دار في دماغي أسئلة كتيرة جدا، يا ترى إيه ممكن يحصل لو كل حاجة اتغيرت بين يوم وليلة وليالينا تتوه بينا، ونمشي من غير أهالينا، هل بالرغم المسافة هنعرف نتواصل مع بعض ولا مش هنعرف ونتوه، ونقول الدنيا جت علينا، ودا اللي كتاب ليالي الكورونا وصفة، في ظرف يوم وليلة كل حاجة اتغيرت أهالينا وحبايبنا اللي كنا قريبين منهم بقينا بعاد عنهم غصب عننا عشان نحميهم، حتى السلام بالايد كان ممنوع.

كتاب ليالي الكورونا هو توثيق لموهبة 20 كاتب استغلوا وقت الحجر في الإبداع، ووصف الواقع اللي كنا بنعيشه وقت الكورونا بكل حذافيره، حياتنا وحياة الناس اللي بنحبهم كانت على كف عفريت، الحيرة والتوهة والتوتر ومتابعة الأرقام والإحصائيات كانت متصدرة شاشات التلفزيون وقتها، حتى السوشيال ميديا مكنش فيه بوست بيعيدي من غير حالة وفاة، فترة صعبة لكن حاولنا نعيشها ونستغل تفاصيلها بكل إبداع في كتاب واحد “ليالي الكورونا”.

في النهاية، وبالرغم من كل الشجن والبُعد اللي مرينا بيه، طلعنا أحسن ما عندنا ودا اللي أثبتوا كتاب ليالي الكرونا، هستناك تقرأ وتقولنا أي قصة فيهم بتوصف تجربتك وقت الحجر؟