أفضل 23 كتاب ورواية في 2023

مقالة النهاردة من أكثر المقالات اللي بنحب نكتبها في iRead، لأنها مش بس بتقولك إيه الكتب أو الروايات اللي كسبت إعجاب القراء خلال السنة، لكن تعتبر حيلة للهروب من الشعور بتأنيب الضمير تجاه الكتب اللي كنت واعد نفسك تقرأها السنة دي ومقرأتهاش، وتدي لنفسك فرصة تانية أنها تدخل معاك في تحضيرات قراءات 2024

أفضل 23 كتاب ورواية في 2023، حضر مشروبك المفضل ويلا بينا:

ممتلئ بالفراغ:

كتاب مُمتلئ بالفراغ للكاتب عماد رشاد، بيتكلم عن الصدمات النفسية وازاي مواقف الطفولة بتأثر فينا من الداخل وازي بتنعكس على طريقة رؤيتنا لنفسنا، كمان الكتاب بيسلط الضوء على الإدمان بشكل عام سواء كان السلوكيات أو العلاقات أو اضطرابات الطعام وبيشرح بشكل بسيط الحاجات اللي بتتسبب في كل دا وبيطرح حلول فعالة.

أسفار مريم المحرمة:

رواية أسفار مريم المحرمة للكاتب طارق عز، بتحكي عن الطبقة المهمشة في الإسكندرية واللي مش كتير مننا عارف عنها حاجة، أسلوب الرواية متعدد الشخصيات، طريقة الوصف هتخليك تغرق في سحر ليل المكس، وتحس أن أهله صاحبك من زمان، كل دا بحبكة درامية شيقة ونهاية قوية.

عهد دميانة:

رواية عهد دميانة للكاتب أسامة عبد الرؤوف الشاذلي، بتدور أحداثها في العصر الفاطمي في إطار درامي إنساني تاريخي عن حياة دميانة، محور الرواية في البحث عن الهوية والصراعات العرقية، والعهد اللي سابه يوسف لابنته دميانة اللي بيمنحها الحرية في الدين والعقيدة والجواز، الرواية هتبهرك في جمال التركيب اللغوي والتشبيهات البلاغية واختيار الأسماء.

أبو الهول:

رواية أبو الهول للكاتب أحمد مراد، بيحكي فيها يوميات مصور الموتى والخبير الجنائي سليمان جابر، الرواية فانتازيا سيريالية يتلاشى فيها الحد الفاصل بين الواقع والخيال، هتكون في حيرة هل الأحداث دي حصلت فعلاً ولا من خيال سليمان، الكاتب وضح المصطلحات التاريخية لمصر الخديوية ونظريات الماسونية والمتنورين، بطريقة سرد تشدك برشة كوميديا زودت الرواية لذاذة.

عنده ضيوف:

كتاب عنده ضيوف للكاتب عمر طاهر، كتاب هتحبه من أول صفحة، هتلاقي قصص قصيرة ومقالات وحكايات بتعبر عنك، متنوعة بين الموسيقى والكورة والجيلي وهيبة زمان و أول حب وفتاة أحلامك، وحب عمار الشريعي وخيال بليغ حمدي، كتاب هيوصل لقلبك عشان مكتوب من القلب.

وأنت السبب يابا:

كتاب وأنت السبب يابا من تأليف الكاتبة نوارة نجم ابنة الفنان الراحل أحمد فؤاد نجم، بتحكي طفولتها كونها ابنه الفاجومي وحبها الغير مشروط ليه، لغة الحوار العامية المصرية بتظهرك جانب آخر من كواليس حياة نحم، وثقافة المجتمع المصري وقتها، بأسلوب سهل وسلس وممتع.

مقامرة على شرف الليدي “ميتسي”:

رواية مقامرة على شرف الليدي ميتسي للكاتب أحمد المرسي، هتاخدك في رحلة لعشرينات القرن الماضي، ولكن لقاهرة مختلفة، ملحمة تاريخية اجتماعية عن حياة المصريين بين الفقر والغنا، الكاتب استخدم اللغة العربية الفصحى والعامية في الحوار بين الشخصيات، ووصف المشاهد محترف بيوصف كل شخصية بتفاصيلها واستخدام ألفاظ مناسبة لزمن الرواية في العشرينات.

تاريخ اليهود في مصر والعالم العربي:

كتاب تاريخ اليهود في مصر والعالم العربي للكاتب ياسر ثابت، بيتكلم عن المرة الأولى اللي دخلوا فيها اليهود مصر وأزاي انتشر مفهوم اليهود العرب ويهود سوريا عايشين فين، وحقائق وتفاصيل تخص أزمنة ما قبل التوراة وجذور المجتمعات اليهودية الأولى، الكتاب هياخد في رحلة طويلة مليانة بالأحداث والألغاز بأسلوب سرد شيق وممتع

ياسمين أبيض:

ياسمين أبيض للكاتبة خولة حمدي، رواية تطرح قضايا ومشاكل هامة وحساسة في نفس الوقت، بداية من الأطفال أصحاب الأمراض الجينية النادرة وتسليط الضوء على معاناتهم إلى المخيمات ومشقتها وضيق الحال ولحد علم النفس وضرورة معرفة مبادئه لأهميته في حياتنا.

حامل الصحف القديمة:

رواية حامل الصحف القديمة للكاتب إبراهيم عبدالمجيد، بيتناول الأحداث اللي مرت على مصر من بداية ثورة 25 يناير ولحد أزمة كورونا، الرواية فيها إسقاطات سياسية واجتماعية ونقد لاذع للأحداث في مصر.

غداء في بيت الطباخة:

رواية غداء في بيت الطباخة للكاتب محمد الفخراني، بتتكلم عن يوميات جنديين مصابين واحد مدرس تاريخ والتاني طباخ، بيبدوأ يحكوا حياتهم لبعض وتصورهم للسعادة ازاي ممكن تكون، من خلال طريقة السرد والحوار الشيقة بين الشخصيات هتكتشف كينونية كل شخصية منهم.

تاريخ الغناء الشعبي:

كتاب تاريخ الغناء الشعبي للكاتب ياسر ثابت، بيحكي تاريخ الغناء الشعبي من أول الموال ولحد الراب في 2023، الكتاب بيتكلم عن المكتبة الموسيقية المصرية والعربية من خلال طريقة سرد متعمقة في الغناء الشعبي والتطورات اللي مرت عليه

لعبة البيت:

رواية لعبة البيت للكتابة إيمان جبل، رواية بتتكلم عن الصرع النفسي بين الحرية والأمان، من خلال بيت سارا وماتيلدا وليلى اللي مليان بالأسرار والغموض، طريقة السرد شيقة ولغة النص سهلة بتجمعهم حبكة درامية فلسفية.

أذكار الموت:

رواية أذكار الموت للكاتب حسن الجندي، رواية رعب شيقة بتتكلم عن القتل المتسلسل وتحضير الأرواح بلغة حوار متنوعة بين الفصحى والعامية بحبكة درامية ممتازة ونهاية غير متوقعة

الطاهي يقتل الكاتب ينتحر:

رواية الطاهي يقتل .. الكاتب ينتحر للكاتب عزت القمحاوي، توليفة من نوع خاص بين حب الكتب والكتابة والطبخ والطعم اللذيذ، الرواية بتتكلم عن الطبخ والكتابة بإعتبارهم فن يلزمه الإبداع، هياخدك في رحلة بين عالم نجيب محفوظ وماركيز ويوسا إلى ألف ليلة وليلة بتوابل شرقية أصلية، ولحد ما يقدملك البروست والمادلين، بأسلوب ممتع ولذيذ.

تبدأ الحياة خارج منطقة راحتك:

كتاب تبدأ الحياة خارج منطقة راحتك للكاتبة لبنى الحو، يتنمى إلى نوع كتب التنمية الذاتية وتطوير الذات، هيساعك في تعديل نمط تفكيرك وسلوكك، وبيقدملك حلول هتساعدك في تحسين تصرفاتك، لغة الحوار بسيطة ومفهومة ومنظم في عرض وطرح الأفكار، في آخر كل فصل هتلاقي ملخص عن محتواه.

دايرة الرحلة:

كتاب دايرة الرحلة للكاتبة سارة الذهبي، الكتاب يعتبر بمثابة جرعة فضفضه في 3 حكايات كل حكاية فيهم بتعبر عنك في محاولة لفهم الحياة والناس لهدف واحد وهو النجاة وسط زحمة الدنيا.

نبوءة قصر السلطان:

نبوءة قصر السلطان للكاتبة مروى جوهر، رواية فانتازيا تربط بين الواقع والخيال والواقع والحاضر الماضي، بلغة سهلة وبطريقة مشوقة هتحببك في التاريخ وبالأخص تاريخ المماليك.

وهج القمر:

رواية وهج القمر للكاتب مايكل تشابون، بتحكي قصة جد تشابون، وهو كان جندي في الحرب العالمية الثانية وعنده شغف اتجاه الصواريخ اتجوز من فرنسية يهودية هربت من محرقة الهولوكوست، طريقة السرد مزيح ما بين المذكرات اليومية والقصص الخالية مليانة بالتحديات والمغامرات

رحلات الطرشجي الحلوجي:

كتاب رحلات الطرشجي الحلوجي للكاتب خيري شلبي، خلطة ما بين الحاضر والتاريخ، هتحس وأنت بتقرأ أنك بتتمشى في شوارع القاهرة بأزمنة مختلفة من عصر المماليك والأيوبيين والخلفاء، الكتاب بيوضحلك المفارقات الدرامية في الحياة، ابن شلبي بطل الحدوتة هتحس أنه معجون بروح مصرية مألوفة ومحبوبة، طريقة السرد سلسة ولغة الحوار بسيطة وممتعة.

جريمة في بيت المتولي:

رواية جريمة في بيت المتولي للكاتب محمود وهبة، بيحكي قصة بيت مهجور في إحدى المناطق الشعبية حصلت فيه جريمة قتل لثلاثة أشخاص، البيت كان مشهور أن صاحبه بيسخر جن وشياطين لخدمته، وتتوالى الأحداث بطريقة سرد عبقرية ووصف سينمائي ونهاية غير متوقعة

تذكرة نجاة للانطوائيين:

تذكرة نجاة للانطوائيين للكاتب باتريك كينغ، بيتكلم عن الشخصيات الانطوائية وخصائصهم، وأزاي بيتعاملو في حياتهم مع نفسهم ومع غيرهم، الكتاب بيسلط الضوء على نقاط القوة للانطوائيين، وأزاي يستغلوها

فكر وتصرف كأنك قط:

فكر وتصرف كأنك قط للكاتب ستيفان جارنييه، الكتاب بيوضح 40 تصرف للقطط بين الكاريزما والهدوء والاهتمام والحب وغيرها، ومن خلال القطة الكاتب بيستمد الأساليب دي عشان نتعامل بيها في حياتنا اليومية، بطريقة سرد لطيفة وظريفة هتحس كأنك نفسك تربي قطة من جمال الوصف واختيار المواقف

دي كانت لفة في أرفف 2023، هنستناك تقولنا إيه الكتب اللي قرأتها في 2023 وإيه الكتب اللي مكملة معاك في 2024

فريق iRead كتب المقالة بكل الحب عشان يشجعك على القراءة بإنتظام، أنت تستاهل انك تثقف نفسك وتبسطها، شكراً لانك وصلت لحد هنا.