إزاي تستمتع بوقتك في الصيف في 7 خطوات “من غير ملل”

كلنا عافرين إن في فريقين في موضوع الصيف ده، مابين محبين الصيف وكارهيّ، سواء اتفقت عليه أو أختلفت هيفضل هو الموسم اللي بنفرغ طاقتنا فيه ونشحن تاني لنص السنة اللي جاي بعده، بنهرب فيه من مشاغل الحياة والروتين والدراسة وبنحاول نتبسط فيه على قد ما نقدر، ولكن في ناس مش بتعرف إزاي تستمتع بوقتها، واحنا في المقال ده هنساعدك تستمتع بوقتك في الموسم اللي بيجمع الناس كلها في الأجازات، الصيف…

هنرشحلك حاجات تعملها في يومك هتحسسك إن كل صيف بيعدي عليك هو صيف جديد ومش مكرر زي كل سنة، وأهم حاجة إنك تستمتع بيها.

1- اختار هواية لكل صيف
عارفين إن كل واحد عنده هواياته الخاصة، بس مفيش مانع تجرب هوايات جديدة عليك يمكن تكتشف نفسك فيها وتضمها ضمن هواياتك المفضلة.

اختار كل صيف هواية مختلفة عن السنة اللي قبلها وخليها هوايتك طول موسم الصيف وخصص لها وقت من يومك، زي الآركيت (التشكيل على الخشب)، التلوين، التطريز، وحاجات كتير من الحرف اليدوية اللي ممكن تشغل وقتك بيها وتتعلمها بالممارسة ويكون عندك معرفة بيها، الهواية هتضيفلك معرفة وتسلية ممتعة.

2- اختار كل مرة لعبة مختلفة
مش كل إجازة تعلب نفس اللعبة أكيد هتمل! عشان كده بنرشحلك تغير كل موسم صيف بلعبة جديدة، مرة كوتشينة، مرة كرة طايرة، مرة ليدو، وفي راكيت و دومينو والعاب كتيير ذهنية وبدنية تقدر تنوع فيهم.

هتلاقي نفسك بكل سهولة عارف تستمتع بوقتك من غير ملل وتكرار.

3- اختار كتاب يبقى صديقك طول الصيف
احنا مش في مسابقة عشان تعمل تارجت لنفسك هتقرأ كام كتاب في الصيف! ممكن تقعد الصيف كله في كتاب واحد!
هنقولك ليه، الصيف عايز حركة وبحر ولعب وتسالي في الإجازة، وعشان كدة مش لازم وقتك يبقى كله للقراءة، مهم تختار كتاب كبير يكمل معاك الصيف أو بعض الكتب اللي عدد ورقها قليل هتلاقيها في المقال ده:

4- اكتب أفكارك
مهم تعرف نفسك وتكتب مشاعرك وأفكارك وخططك اللي جايه عشان تعرف ترتبها صح وتفهم نفسك اكتر، هتلاقي ونس مع الكتابة، فضفضة للورق هتنفض التراب وتروق بالك وتمسح الأحاسيس السلبية اللي جواك، وكمان هتطبخ خطط مستقبلية بخطواتها على نار هادية.

اخطف نص ساعة في اليوم تأمل فيها وخد وقتك في التفكير واكتب..

5- اعمل حاجة تبسطك
فكرت تكتب في ورقة إيه هي الحاجات اللي بتبسطك؟ دور عليها في ابسط الأشياء اللي حواليك، قاعدة في المغربية بكوباية قهوة أو شاي بالنعناع، تأمل الغروب أو الشروق، قاعدة فيلم لذيذ، أكله حلوة غيرتلك مودك، حاجات كتير حوالينا بسيطة بنعملها مفعولها قوي على نفسيتنا وبنستمتع بيها جداً عشان كده خليك حريص إنك تعمل حاجة تبسطك في إجازة الصيف.

6- أعمل تجربة جديدة
إحساسك في أول تجربة لأي حاجة من أحلى الأحاسيس الممتعة، في كل موسم صيف متنساش تجرب كل مرة تجربة جديدة تعيشك جو من الإثارة التشويق زي الرياضات المائية المختلفة اللي بتتعمل في البحر، اركب عجلة، طير طيارة ورق، اركب حصان على البحر، جرب تشوي لأول مرة ومش مهم النتيجة المهم إنك جربت.

سلي نفسك وأعمل تجارب جديدة على قد ما تقدر، التجارب الجديدة بتخليك تكتشف حاجات في نفسك مكنتش تعرف إنها موجودة عندك قبل كده.

7- اطبخ أكله تفتكر الصيف ده بيها
في الصيف عندنا أوقات كتير نخترع فيها حاجات وبنخلق حاجات كتير نشغل نفسنا بيها عشان نتسلى، جرب تخترع وأعمل أكله من ايديك وشوف هتطلع عامله إزاي، أكلة تفتكر بيها أيامك في الصيف ده، إحساس الإجازة وحلاوته، ريحة البحر وحرارة الشمس على جسمك والهوا اللي بيطير شعرك، إحساس حلو مش كده؟

هتسألنا إيه الدروس المستفادة من النصايح ديه؟ هنقولك ليه تعملها:

هتكسبك خبره
خبره هتكسبها في الحياة، في الرياضة، في الفنون اليدوية، في كتاب، خبره هتكتسبها حتى في رشة القرفة اللي فوق اللحمة اللي بتشويها اللي أنت جربتها وعجبتك الصيف اللي فات.

هتبنيلك ذكريات حلوة
الغاية هنا مش إنك تعمل حاجة بمثالية! اغلط واضحك على نفسك وجرب تاني وبوظها تاني، الحاجات ديه هتبنيلك ذكريات مضحكة ولذيذة بينك وبين حبايبك، هتكسب ذكريات تجارب تعرق تتكلم عليها في نزولة معاد غرامي أو في قاعدة عائلية في العيد، أو حتى في تجمع مع صحابك،

يبقى عندك مخزون حكاوي تخليك تعرف ترد على سؤال: ها عملت إيه الصيف ده؟

نفسيتك هتتحسن
كسر الروتين وفرصة إنك تجرب حاجات جديدة مسلية ولذيذة هتحسن من نفسيتك وتغذي روحك وتملى الفراغ اللي جواها وتخرج الطاقة السلبية اللي جواك وتستبدلها بطاقة إيجابية مليانة هدوء نفسي وشعلة حماس مبتنطفيش في نفس الوقت.

هتستمتع بوقتك
بكل بساطة وإنجاز، هتستمتع وتسلي وقتك في الصيف!

الحياة لو استسهلناها هنلاقيها سهلة، ولو عايزين نتبسط هنعرف نتبسط بأبسط الطرق واحنا بنسهلها عليك بشوية نصايح يخلوا حياتك احلى، بنتمنالك صيف ممتع ولذيذ، لو عجبك المقال سيب تعليقك لينا وبنشكرك إنك وصلت لحد هنا.