إزاي تفضفض مع نفسك بالكتابة – Journaling
عمرك أخدت بالك أنت إزاى بتتكلم مع نفسك عن نفسك؟!، خلينا نكون متفقين إننا كلنا بنتكلم مع نفسنا ودايمًا بيكون فيه حوار داخلي، احيانًا بيكون صحي وأوقات كتير بيكون سلبي، وفيه مننا اللي بيكون مش واخد باله أنه بيتكلم مع نفسه اصلاً، سواء كنت واعى للحوار الداخلي اللي جواك أو لا التدوين أو ال journaling هو وجهتك الأولى لاكتساب وعي أفضل وصحي عن نفسك وفي المقالة دى هقولك على طرق وأسئلة مختلفة تجاوبها مع نفسك لنفسك بس خلي بالك لازم تكون صريح كده كده مفيش حد هيشوف النوتة دي غيرك أنت ونفسك، جهز قلمك ويلا بينا
اسئلة صباحية
ممكن تجاوب عليها في المواصلات أو أنت رايح الشغل أو الجامعة أو حتى في باص المدرسة المهم أنك تجاوب عليها الصبح
- 5 حاجات أنا ممتن ليها؟
ممكن تكون ممتن للشمس أو لأهلك أو حتى للقميص اللي هتلبسه النهاردة ممكن تكون ممتن لشباك اوضتك مثلاً..الخ
- ناوي على أيه النهاردة؟
ممكن تقول اللي هتعمله في يومك ببساطة حتى لو مش هتخرج من البيت اكتب كل حاجه هتعملها حرفيًا حتى لو هتقوم تغسل وشك وأسنانك.
- هتتعامل مع الناس إزاى النهاردة؟
هنا هتكتب بمبدأ fake it till you make it، مثلًا انا النهاردة حابب أكون لطيف هحاول على قد ما أقدر أكون إيجابي في كلامي وأبتسم وهنا هتبدأ تركز مع نفسك أكثر وعلى الكلام اللي بتقوله و رده فعلك تجاه الآخرين
- ثوابت وتأكيدات؟
منير في أغنية بحر الحياة بيقولك “حبها من قلبك … حبها هتحبك” هتكتب شويه تأكيدات تفكر بيهم نفسك بثوابت موجودة بالفعل في شخصيتك وصفاتك ومبادئك.
اسئلة مسائية
هتجاوب عليها بليل قبل ما تنام وهتكون الحاجة اللي هتختم بيها يومك قبل ما تحط راسك على المخدة وتنام
- حاجات فخور انك عملتها النهاردة؟
هتكتب الحاجة اللي فخور أنك عملتها حتى لو كانت أكله، ساعدت حد يعدي الطريق، جيت في معادك ومتأخرتش أو حتى لو عملت كوباية شاي مظبوطة، المهم أنك تكون فخور بيها.
- حاجات حبيتها في نفسك النهاردة؟
هنا هتشوف أيه الحاجه اللي عملتها النهاردة وحبيت نفسك أوى لما عملتها، ممكن تكون أنك اتحكمت في عصبيتك شوية أو طبطبت على صاحب ليك أو وقفت شخص كان بيأذيك عند حده أو أن كان شكلك حلو ووسيم النهاردة..الخ، المهم أنك تكتب الحاجات اللي حبيتها في نفسك مهما كانت.
- حاجات اتعلمتها النهاردة؟
هتكتب هنا الحاجات اللي اكتسبتها خلال اليوم واتعلمتها سواء كانت عبارة عن مواقف اتعلمت منها درس أو حاجات عملية في الشغل أو الدراسة، المهم تكون اتعلمت منها
- حاسس بأيه النهاردة؟
بعد يوم طويل هتكون صادق مع نفسك وهتقول بكل شجاعة أنت حاسس بأيه سواء شعور سلبي أو إيجابي المهم أنك تتكلم مع نفسك وتسألها حاسه بأيه؟ وتكتب اللي حاسس بيه بكل صدق.
- حاجات مسامح فيها نفسك النهاردة؟
هتكتب الحاجات اللي عملتها النهاردة ممكن تكون غلطت فيها بس أنت مسامح نفسك ومتقبلها، وعادي أنك تغلط وتكتب غلطاتك وتسامح نفسك لأنها تستحق أنك تحضنها وتحبها.
في النهاية أغلب وقتك بيضيع في الإنتظار، مستني القهوة تغلي، مستنى دورك، مستني الأسانسير، مستني الإشارة تفتح، دايمًا فيه حاجات بتسرق منك الوقت من غير ما تحس، عشان كده متخليش الوقت يسرق منك نفسك وابدأ دون يومك واتكلم مع نفسك ومش لازم تستنى الوقت المناسب ولا المواعيد اللي بتقبل القسمة على 60 ولا لما تجيب نوتة وقلم جديد، ابدأ حالاً ومش بعيد تكتشف أنك تنفع تكون كاتب وتقدم في مسابقة iRead
هستنى تقولى في التعليقات وبدأت تدون يومك ولا لسة؟
فريق iRead كتب المقالة بكل الحب عشان يشجعك على القراءة بانتظام، أنت تستاهل أنك تثقف نفسك وتبسطها، شكراً لأنك وصلت لحد هنا.
on العلم المرحكتاب ممتع انصح به
on أحلام ممنوعةكتاب جميل جدا
on رفقاء الليلكتاب رائع- on انستا_حياة#كتاب رائع
- on أنت فليبدأ العبثكتاب رائع
