إعلان عن بوستر مسلسل بالطو للكاتب أحمد عاطف المأخوذ عن كتابه

أعلن الكاتب أحمد عاطف على صفحته الرسمية على فيسبوك قرب صدور مسلسل بالطو على منصة واتش ات والمأخوذ عن كتابه بالطو وفانلة وتاب ببوستر المسلسل كما أعلن عن فريق العمل من ضمنه محمود البزاوى، عارفة عبد الرسول، محمود حافظ، عصام عمر، وغيرهم حيث قال الكاتب على صفحته:

وأخيراً، البوستر الرسمى لمسلسل ” بالطو ”
شوية معلومات سريعة عن المسلسل :

= المسلسل هيتعرض على واتشت قريباً جداً جداً إن شاء الله

= المسلسل مأخوذ عن رواية ( بالطو وفانلة وتاب )

= إخراج : أ / عمر المهندس

= قصة وسيناريو وحوار : أحمد عاطف فياض ( اللى هو أنا و هيجي حد يسألنى يقولى و “فياض” دى جت منين، هرد عليه وأقوله ده أسمى الثلاثى عادى وهيبقى مكتوب ثلاثى كده ع التتر إن شاء الله .. وده لسببين: أولاً عشان فيه كذا ” أحمد عاطف ” فى الوسط الفنى مخرج و موزع موسيقى و مدير تسويق فلازم أضيف “فياض” منعاً لتشابه الاسماء، وثانياً وده السبب الأهم عشان الفنانة فيفى عبده والاستاذ أحمد عبد العزيز ما يعرفوش إنه أنا )

= اه وفيه لعيب كورة كمان فى نادى فيوتشر و جاى الأهلي اسمه أحمد عاطف. مش فاهم انا ايه الحوار ده، الواحد مش عارف يتهنى بـ أسمه!!

= المسلسل عن أحداث قصة حقيقية ، اللى هى قصة حياتى، اللى أعتقد إن أى دكتور شاب بيتخرج فى مصر بيعيش وهيعيش قصة مشابهة ليها .

= الاحصائيات بتقول ان مسلسل “جريز أناتومى” على مدار السنين اتسبب فى دخول قرابة 200 ألف شخص لكلية الطب على أمل انهم يعيشوا أجواء شبيهة، بإذن الله ” بالطو ” يحقق نفس المعادلة و الــ 200 ألف اللى دخلوا طب بسبب جرايز أناتومى يطلعوا من الكلية بسبب مسلسل بالطو

= المسلسل 10 حلقات

= بطولة : نجوم كتير جداً عملوا اللى عليهم وزيادة وفعلا اشتغلوا من قلبهم فى العمل وأنا بشكر كل واحد فيهم من أصغر دور لأكبر دور

= من ساعة ما أعلنت إن ( بالطو وفانلة وتاب ) هيبقى مسلسل، ناس كتير بتدخل تسألنى تقولى مين اللى هيعمل دورك فى المسلسل، اللى يسألنى ويقولى أحمد أمين ؟ واللى يقولى أحمد عيد ؟ واللى يقولى ماجد الكدوانى ؟ فمع حبى الشديد لكل النجوم الكبيرة دول بس المرحلة العمرية للدور محتاجة حد أصغر فــاللى هيعمل دورى ف المسلسل هو الفنان ماجد المصرى

= طبعا مفيش ماجد المصرى بهز. ما انتو شايفين البوستر اهو يا جماعة. اللى هيقوم بالدور هو الفنان الشاب الموهوب جداً جدا ً عصام عمر

وأتمنى فى النهاية إن المسلسل يعجبكو إن شاء الله عشان لو معجبكوش هنتريق عليه هنا ف الصفحة عادى خالص أنا معاكو فى أى حاجة

عن الكتاب:

من أشهر كتب الكاتب الشاب أحمد عاطف والذى يتحدث به عن تجربته الشخصية كطبيب. تبدأ رحلته بعد تخرجه وانتهاء سنة الامتياز ثم يحكى لنا أحمد عاطف عن قصص مرضاه وطرائف حدثت له وقت التكليف. يقول أحمد عاطف فى الكتاب:

بعد انتهاء فترة الامتياز “سنة التدريب اللي قبل التخرج علطول”، وبعد قضائي أجمل الأيام بها.. جاء وقت التخرج.. الوقت اللي طلبة طب كلها بتستناه.. والتخرج يعني حفلة التخرج.. وحفلة التخرج أنا محضرتهاش الصراحة.. مش عشان أنا كنت مقتنع إن مفيش حاجة اسمها تخرج لطالب كلية طب.. وإن طريق الطب طويل ومابينتهيش بحفلة بيكسروا فيها قُلل وبيتصوروا فيها صور تذكارية.. لا إطلاقًا مش عشان كدا.. ولكن عشان كل حفلات التخرج ف الكليات الباقية كانوا بيجيبوا جنات.. إليسا.. رامي صبري، إنما كليتنا العريقة لما فكرت تجيب حد ف حفل تخرجنا راحت جايبة نائب محافظ الغربية!.. اللي هو نهار إسود يعني.

عن الكاتب:

أحمد عاطف هو كاتب وطبيب مصرى شاب. اشتهر بسبب صفحته على السوشيال ميديا التى يسخر بها من الأفلام والمسلسلات بشكل كوميدى طريف. قام أيضًا بنشر عدة كتب كوميدية منها بالطو وفانلة وتاب، الإنس والجبس، وغيرهم من الكتب.