في الفترة الاخيرة كنت بحاول الاقي كتاب مناسب يهون عليا ليالي الشتاء الطويلة، بقرأ العناوين بنجذب للاغلفة، لحد لما قرأت حوالي 3 كتب خلال شهر وبردوا ملقتش نفسي، ومن هنا بدأت رحلة إكتشافي لأعماق تفكيري وطريقة تذوقي للفن والأشياء، زي المزيكا غالبًا بميل لحقبة الثمانينات والتسعينات لكن ده ميمنعش اني بحب اسمع راب، بدأت بفرز كومة كبيرة من الكتب والروايات وقرأت أول صفحة منها عشان اشوف اذا كنت لسه فاكره محتواها ولا لا وهل هتكمل في مكتبتي ولا هقطع لها تذكره وداع وتبدأ رحلة جديدة في مكتبه شخص تاني، والنتيجة اني طلعت بكام خطوة هشاركها معاكم عشان تقدروا تكتشفوا الكتب اللي هتحبوها من أول صفحة.
تأمل اهتماماتك الشخصية
جنب كل سرير اباجورة وكوباية شاي، هات ورقة وقلم أو في نوتة الموبايل اكتب فيها اهتماماتك الشخصية، الحاجات اليومية اللي بتستمع بيها، مغامرات كل يوم في المواصلات قصص الحب اللي بتشوفها، الأفكار الفلسفية اللي بتسمعها، الاغاني، الافلام وحتى الالوان اللي بتحبها بمعنى لو انت بتحب تشوف الافلام البوليسية فممكن تستمع بروايات الغموض والجريمة.
اقرأ أول صفحة
فيه نظرية في التسويق اسمها نظرية البسبوسة، ودي بتدوق فيها العميل حتة من تجربتك او خبرتك عشان يطمن ويطلب الخدمة منك، نفس الفكرة مع أنواع الأدب، جرب جزء بسيط من كل حاجة ” روايات الخيال العلمي، الفانتازيا، الكلاسكيات، أدب واقعي، تاريخ، فلسفة، تنمية ذاته، وحتى الشعر، التنوع هيديلك فرصة تكتشف شغفك، القراءة الإلكترونية بتوفرلك الطريقة دي بشكل سهل، ممكن تنزل ابلكيشن iRead eBooks وتقرأ أول صفحة من أي رواية حابب تقرأها وتشوف اذا كانت تناسب ذوقك ولا لا.
افتكر الكتب اللي استمتعت بيها
فكر في الكتب و الروايات اللي قرأتها قبل كده وحبتها، اسأل نفسك، ايه اللي عجبك فيها ” القصة الشخصيات – الأسلوب – أو المعلومات عامًة”.
شوف التقييمات والترشيحات
ممكن هنا تستعين بصديق بس وارد انه يحرق ليك الحدوتة، او ممكن تقرأ ترشيحاتنا للكتب والروايات بدون حرق، وهتاخد فكرة عن فكرة الرواية، أسلوب وطريقة سرد الكاتب، والبُعد الأدبي والدرامي ليها. دوس هنا واقرأ الترشيحات
اكتشف أساليب الكتابة
ركز على أسلوب الكتابة هل بتحب اللغة البسيطة العامية ولا الأدبية الثقيلة، هل بتستهويك النصوص اللي بتحتوي على تأملات عميقة ولا اللي بتقدم المعلومة بشكل مباشر وسريع؟
واجه نفسك
اسأل نفسك وجاوب بصراحة ايه اللي عايز تحققه من القراءة، التسلية ولا التعليم ولا الهروب من الواقع، أو تصدير صورة مثقفة عنك للآخرين، تحديد هدفك هيساعدك تعرف ذوقك أكثر.
خليك صبور مع ذوقك
الذوق دايمًا بيتطور وده بيرجع لمرور الوقت ممكن اللي تحبه النهاردة يختلف عن اللي بتحبه بعد سنة أو أكثر، ومش شرط عشان فيه كاتب معين الناس كلها بتشيد بيه ان يعجبك اسلوبه في الكتابة طبيعي جدًا انك متحبوش، الأمر ذوقي بحت!.
دون ملاحظاتك
خلي دايمًا في جيبك نوته تكتب فيها وتدون عن الكتب اللي قرأتها، احساسك وقتها الأغنية أو المزيكا اللي كانت بتشاركك أوقات القراءة، إيه اللي حبيته فيها واللي زعلك من أبطال وشخصيات الرواية، اكتب ليهم رسائل بتشاركهم فيها افكارك عنهم، مع الوقت هتلاحظ إن ذوقك اتحدد بشكل أفضل.
في النهاية خليك صبور مع نفسك ومع الوقت ذوقك في القراءة هيتحدد بشكل أفضل، ولكن عشان تساعد نفسك امشى على الخطوات اللي ذكرتها في المقالة وأهمها: ” اكتشف اهتماماتك – اقرأ أول صفحة من الكتاب، اقرأ ترشيحات – دون ملاحظاتك وأهم حاجه تواجه نفسك”.
الجدير بالذكر أن المقالة دي سيتم نشرها بالتزامن مع فترة معرض الكتاب، اتمنى تلاقي الكتاب اللي يستاهل وقتك، متنساش تعمل لايك وشير لو المقالة عجبتك.