ازاي تبني عادة القراءة عند طفلك؟

القراءة من أكثر المهارات اللي بتفتح أبواب الخيال والمغامرات لطفلك، كمان بتعلمه حاجات جديدة وبتزود حصيلته اللغوية واللي بدورها هتساعده في الكلام والتعبير عن النفس، عشان كده لازم تساعده في بناء عادة القراءة حتى لو 10 دقائق كل يوم، وفي مقالة النهاردة هنقولك ازاي تبني عادة قراءة مسلية وممتعة لطفلك.

مراحل القراءة

مقدار القراءة بيختلف من سن لآخر، عشان كده لازم تحدد المرحلة العمرية لطفلك وبعد كده تختار الكتب المناسبة لتحفيزه على بناء عادة القراءة، واللي هنتعرف عليها دلوقتي:

من عمر الولاده ولحد 18 شهر 

• بيفرج على الكتب والألوان والأشكال اللي موجودة ويحاول يقلب الصفحات 
• بيقلد الكلام اللي بيتقال ليه وبيسمعه.
• مع بلوغه سنة ممكن يقول كلمة واحدة أو أكثر 

من 18 شهر إلى 3 سنوات 

• ممكن ينطق من 250 كلمة إلى 350 كلمة ومع بلوغه 3 سنوات ممكن ينطق ما بين 800 إلى 1,000 كلمة.
• بيقلد طريقتك في حكي الحدوتة له
• هيطلب منك تقرأ له 
• يستمتع بالكتب وتجذبه غلافها عشان كده سيبه يختار 

من 3 سنوات إلى 5 سنوات 

• يدرك الحروف البسيطة وبيحاول يكتبها زي ( أ – ب – ت – ث) 
• بيمسك الكتاب بطريقة صحيحة ويقلب الصفحات من نفسه 
• بيبدأ يتعلم ويكتسب خبرة من الكتب 

من 5 سنوات إلى 8 سنوات 

• بداية دخوله المرحلة الإبتدائية في التعليم 
• يكون جمل ويكتبها 
• يكون ويصيغ الأفكار بشكل صحيح 
• يمكنه تأليف قصة من وحي خياله 

ازاي تشجع ابنك على القراءة 

بعد تحديد المرحلة العمرية لطفلك، اعتقد انك دلوقتي قدرت تحدد نوع الكتب اللي هتشتريها لطفلك، ولكن ازاي تشجع ابنك على القراءة بشكل مستمر، ده اللي هنعرفه دلوقتي 

حدد وقت للقراءة

دخل القراءة ضمن العادات اليومية لطفلك وخصص لها وقت مثلًا قبل النوم 

امنع المشتتات 

وقت القراءة حاول تمنع أي حاجه ممكن تشتت انتباه طفلك زي الموبايل أو التابلت والتليفزيون 

مكتبة خاصة للقارئ الصغير 

حاول تعمل رف في غرفة طفلك تجمع عليه كل الكتب اللي بيحبها، عشان يختار منها وتبدأ رحلة قراءته 

زيارة إلى المكتبة 

حاول كل فترة تنزلو تشتروا كتب سوا ويختار الكتاب اللي عايز يضمها لمكتبته.

تبديل الأدوار 

خلي طفلك هو اللي يقرأ ليك حدوته، وشوف خياله هيوديه لفين ومن هنا تقدر تعرف ايه اللي بيستفيده من القراءة وأنواع الكتب اللي بيحبها 

أفضل 3 قصص ممكن تهدي بيهم ابنك 

سوبر صفية والبقرة الغنية 

صفية هتاخد طفلك في مغامرة لذيذة مع الأكل بطريقة مسلية هتعرفهم مكونات الأكل ووصفات سهلة، هتساعدك بيها في المطبخ، القصة من كتابة ريم جميل ورسومات سارة مرعي

اطلبها من هنا 

منكوش

حكاية ريم مع صديقها الغراب أبو ريش منكوش، لما اتعامل برفض من بابا وماما وحتى ميس كريمة، وأصحابها خافوا منه، ولكن بالرغم من شعور ريم بالوحدة إلا أنها كانت بتحب صديقها منكوش المنكوش جدًا، خلال القصة ابنك هيتعرف أكثر عن الحب والصداقة واختلاف الأذواق وعن الغراب أذكى الطيور.

اطلبها من هنا 

سلسلة سفراء الأخلاق

من أحلى الكتب اللي هتقدمها لابنك هي سلسلة سفراء الأخلاق، هتعلمه معاني ومفاهيم كثيرة عن التعاون والاحترام وحسن اختيار الأصدقاء والتواضع وغيرها من الأسس اللي هتبني شخصيته وأخلاقه في المستقبل 

اطلبها من هنا 

عادة القراءة من أهم العادات اللي ابنك هيشكرك عليها في يوم من الأيام، ابدأ ابنيها فيه من ولادته عشان هو يستاهل يعيش ألف حياة مش حياة واحدة.