الحشاشين

مين هما الحشاشين؟

طائفة الحشاشين أو الحشيشية، هما فرقة انشقت من فرقة الإسماعيلية ” احدى الفرق الشيعية ” ، كانت بدايتهم في مصر على ايد راجل اصله فارسي اسمه ” الحسن بن الصباح” كانوا بيتسموا النزارية وبعد كده لقبوا بالحشاشين، كانوا يؤمنون بوجود إمام معصوم منصوص عليه من ولد محمد بن إسماعيل، بيقولو ان فيه ‘إمام غائب أو مستور وغيرها من المعتقدات الباطلة، عملوا ثورات ومحاولات اغتيال كثيرة على حكام المسلمين، كان ليهم دولة اسمها النزارية الشرقية في الشام وفارس وبلاد الشرق. 

ليه  اسمهم ” حشاشين”؟ 

فيه أكثر من رواية بتقول ليه اسمهم “الحشاشين”، يقال انهم كان بيستخبوا ورا الحشائش اللي في الأرض عشان يعرفوا يقتلوا، ورواية تانية بتقول انهم كانوا يتعاطوا الحشيش، أو ده الاسم الاشتقاقي من كلمة ASSASSIN ” بمعنى القتلة” ودى تسمية كان بيطلقها الفرنسيون الصليبيون على الإسماعيلية اللي كانو بيقتلو ملوك وقادة جيوش الفرنسيين. 

روايات وكتب اتكلمت عن الحشاشين

رواية سمرقند

الأديب اللبناني أمين معلوف، كتب رواية سمرقند على جزئين، أول جزء بتدور أحداثه في بلاد فارس ” إيران” وآسيا الوسطى في القرن الحادي عشر، بتحكي قصة رباعيات الخيام عبر تاريخ الدولة السلجوقية وازاى كانو بيتواصلوا مع الشخصيات المؤثرة منهم زى الوزير وحسن الصباح الزعيم وعلاقة حبه بالشعر اللي بدأ في سمرقند. 

أما الجزء الثاني، فبيحكي قصة روائي أمريكي اسمه بنجامين ليسيج، كان بيحاول يوصل لنسخة أصلية من الرباعيات، وبيوضح كمان التاريخ الفارسي أثناء الثورة الدستورية الفارسية اللي كانت في الفترة ما بين 1907 – 1905، عشان بعد كدا المخطوطات تضيع منه في حادثة غرق السفينة تيتانيك. 

الحشاشون فرقة ثورية في تاريخ الإسلام

الكاتب برنارد لويس، وهو أستاذ دراسات الشرق الأوسط في جامعة برنستون، بيحكي قصة تاريخ فرقة الحشاشين وعقائدها بداية من نشأتها في القرن الحادي عشر وحتى نهايتها على يد المغول. 

كتاب حركة الحشاشين

الدكتور محمد عثمان الخشت رئيس جامعة القاهرة، بيوضح ديناميكية العالم الإسلامي الموازي لحركة الحشاشين بطريقة سهلة وممتعة ومن غير اى تعقيد، مع ربط سلسل لجميع مراحل الحركة وربطها بأحداث مهمة جدًا زى اغتيال الخليفة العباسي والفاطمي وصلاح الدين الأيوبي والصليبيين والتتار وغيرهم، مع ذكر اسباب تسميتهم وانقسام الإسماعيلية للنزارية.

علاقة مسلسل الحشاشين بقبيلة الحشاشين؟ 

المسلسل بتدور أحداثه بطريقة تاريخية في القرن الحادي عشر، عن زعيم الحشاشين ” حسن الصباح” وفرقته اللي اتشهر بعمليات الاغتيال لشخصيات كانت مؤثرة وليها سلطة في الوقت ده، المسلسل من إخراج بيتر ميمي وبطولة كريم عبد العزيز، بيشاركه البطولة فتحي عبدالوهاب – أحمد عيد –  نيقولا معوض – إسلام جمال – ميرنا نور الدين، المسلسل من تأليف عبدالرحيم كمال. 

إعلان المسلسل: 

في النهاية إعادة كتابة التاريخ أو فترات معينة منه  بأى شكل من أشكال الفنون، يعتبر تأكيد بأن لكل ظلم نهاية، لأن الحشاشين يعتبروا من اكثر الفرق الدموية في تاريخ البشرية كلها ولكن انتهوا زيهم زي اللي قبلهم. 

قال الله عز وجل: ﴿ فَتِلْكَ بُيُوتُهُمْ خَاوِيَةً بِمَا ظَلَمُوا ﴾ [النمل: 52].

فريق iRead كتب المقالة بكل الحب عشان يشجعك على القراءة بانتظام، أنت تستاهل أنك تثقف نفسك وتبسطها، شكراً لأنك وصلت لحد هنا.