الروايات الأكثر قراءة لسنة 2024

في مشهد شاعري.. نازلة من بيتي الصبح، الأشجار بتتمايل على اليمين والشمال، أشعة الشمس بتلاطف القطط في الشوارع، والهواء بيلاعب خصلات شعري، فجأة. وصلتني رسالة من مديرتي بتأكد فيها على أهمية تسليم مقالة “الروايات الأكثر قراءة في 2024″،  أدركت في لحظتها أننا في أخر شهور السنة “ديسمبر”، الحقيقة كل مرة بتفاجئ وأقول ايه ده هو احنا خلاص وصلنا لنهاية السنة!

وبالرغم من كمية المشاعر المتلخبطة.. هاجمتني عناوين الكتب اللي مرت في ذاكرتي زي فلاش باك لفيلم قديم، وقدرت أعرف ايه أكثر الروايات اللي عجبت أغلب القُراء خلال سنة 2024، وفي المقالة دي هنتعرف على قصتهم والبعد الدرامي والإنساني لكل رواية، حضر مشروبك الشتوي المفضل ويلا بينا.

مقامرة على شرف الليدي ميتسي – للكاتب أحمد المرسي

الرواية بتتكلم عن المجتمع الأرستقراطي اللي مليان بالمظاهر الزائفة والأسرار الغامضة، بتتورط سيدة من الطبقة العليا”الليدي ميتسي” في مقامرة خطيرة بتهدد شرفها وسمعتها، بتتعرض للإبتزاز والمعضلة هنا في أنها تختار بين كرامتها أو كشف أسرارها، البعد الدرامي للرواية مشحون بالتوتر الناتج من صراع الحفاظ على الذات والواقع في خطر، الرواية في بعدها الإنساني بتركز على نقاط ضعف النفس البشرية ” الطمع، الخوف من الفضيحة، والرغبة في السيطرة وهشاشة المظاهر الإجتماعية مع ضغط الحقيقة.  – دوس هنا واقرأ دلوقتي

قناع بلون السماء – للكاتب باسم خندقجي

رواية قناع بلون السماء بتدور أحداثها في سنة 2021 بالتزامن مع أحداث حي الشيخ جراح، بتحكي عن نور اللي الصدفة لعبت دورها في حياته لما لاقى جاكيت أزرق قديم لجندي اسرائلي عشان يتحول من نور إلى أور في محاولة لفهم مفردات العقل الصهيوني، البعد الدرامي للرواية بيتجسد في الصراع بين الأمل، اليأس، الإنتماء، الوحدة، في محاولة للحفاظ على إنسانية الإنسان برغم الظروف القاسية الرواية فازت بجائزة البوكر. – دوس هنا واطلب دلوقتي 

حرب الزانون –  للكاتب فادي زويل

رواية فانتازيا بتدور احداثها في عالم ” الزانون” اللي مليان بالطغاة والمستبدين، بتبدأ الحرب بين البشر والكائنات الماورائية اللي بتتنافس على السلطة، أبطال الحكاية في حرب لتحقيق العدالة ولكن مش بيسلموا من الخيانات الداخلية والخارجية، البعد الدرامي للرواية بيجسد الصراع بين قوى الخير والشر داخل النفس البشرية، وازاي ممكن السلطة تدمر مجتمعات واهمية الإدارة البشرية عشان تقدر تواجه القهر. – دوس هنا واقرأ دلوقتي 

دماء على السجادة الحمراء – للكاتبة نهى داوود

بتبدأ الرواية في حفلة ختام مهرجان سينمائي، بتحصل جريمة قتل لأحد أشهر المنتجين، التحقيقات بتتم مع مجموعة من الأشخاص اللي كانوا مع المنتج أثناء الحفل، وكل واحد فيهم ممكن يكون عنده دافع للقتل ولا يمكن المنتج قتل نفسه في مشهد درامي؟، الرواية بتسلط الضوء على الوجه المظلم من الشهرة، وازاي طموحك والغيرة ممكن يدمرك بدل ما ينفعك. دوس هنا واقرأ دلوقتي 

مواليد حديقة الحيوان – للكاتب أشرف العشماوي

رواية مؤلمة عن 3 حكايات لأشخاص مختلفين تعرضوا للظلم، ببناء سريدي بيخلط الواقع بالامعقول بيكشف سخرية القدر والحياة بين أحلام الأبطال وواقعهم المؤلم، عشان يسيبك في نهاية الرواية تسأل نفسك ” هل الإنسان مسير بين واقع بيفرض قواعده وسطوته عليه ولا مخير بين قراراته اللي عواقبها ممكن تكون كارثية، الرواية بتسلط الضوء على قهر الفئات المهمشة في المجتمع من فقر، ظلم، صراعات بين الشخصيات، وغياب الحلم بمستقبل أفضل. – دوس هنا واقرأ دلوقتي 

الديبو – للكاتب محمد المأمون

الرواية بتحكي قصة حليم وهو طفل غير عادي، من اول ما اتولد وفيه كائن أحمر غريب ملازمة، على طول بيبص عليه من غير ما يمل، مش بياكل ومش بينام، الحياة اخدت من حليم أكثر ما ادته، دوقته من مرها في قسوة ابوه عليه، وده اللي خلى حليم يسيب بيت والده ويعيش مع جده عشان تبدأ حكايته، طريقة السرد مزيج بين السخرية والمأساة ببناء دارمي متماسكك بين الشخصيات، يعكس الحياة الواقعية. – دوس هنا واطلب دلوقتي 

موت مع إيقاف التنفيذ – للكاتب طارق عز

10 قصص قصيرة هتعيش معها حيوات متنوعة لناس مختلفين، بالرغم من أن الموت هو عنوانها إلا أن الكلام عن الموت هو محاولة لفهم الحياة، حبكة الرواية هتحيرك بين التشويق والخوف من المجهول، البعد الإنساني للرواية بيناقش موضوعات بتدور في بالك كل إنسان من الإخلاص والتوبة وقدرته على تخطي الماضي. دوس هنا واقرأ دلوقتي 

سيادة القاضي – للكاتبة نور عبد المجيد

رواية واقعية عن قاضي بيتعرض لضغوط صعبة جدًا في قضية حساسة، والتحدي هنا في مواجهة فساد القضاء وضغوط السلطة والمجتمع، صراع أخلاقي عميق وتوتر نفسي في مواجهة أبطال الرواية، ولكن هل هيقدر يحافظ على مبادئه في بيئة تفتقر للعدالة؟ – دوس هنا واقرأ دلوقتي 

يوم قُتل الزعيم – للكاتب نجيب محفوظ

محفوظ بيحكيلك في الرواية دي عن تأثير اغتيال الرئيس ” أنور السادات” على الطبقة المتوسطة من المجتمع المصري، بكل التحديات والتحولات السياسية والاجتماعية اللي كانت بتأثر فيه وبيشارك فيها، إحساسه بالتوتر من المستقبل والصراعات الوطنية، الرواية في بعدها الإنساني بتسلط الضوء على ازاي ممكن الأحداث السياسية تأثر على حياة المواطن البسيط، وهشاشته النفسية قدام التغيرات السياسية الكبيرة. – دوس هنا واقرأ دلوقتي 

في النهاية 2024 كانت مليانة بالقصص والحكايات منها المثيرة والمعقدة والإجتماعية والإنسانية اللي  بتفتح شباك افكارك لعوالم جديدة بتخليك تشوف الحياة بشكل أعمق وبتديلك فرصة تفهم نفسك مع كل حكاية، بتمنى لك قراءة ممتعة في 2025 ومتنساش تقولي الروايات اللي عجبتك في التعليقات.