رحلة في الأدب اللاتيني: 7 ترشيحات لأفضل الروايات اللاتينية

نهار مشمس وأشعة شمس نازلة علينا زي خيوط الدهب بتحاوطنا بكل دفا، وحرارة بتلمسنا تأكدلنا إننا عايشين وبنحس..

في وقت الظهرية أطفال بتلعب حوالين البيت بمزيج من الضحك والصريخ..وأحياناً البكاء، سما بلون البرتقال وأرض ذهبية بتلمع بلون الشمس وهوا شايل أحلام كتيير بينقله من مكان لمكان ومن بيت لبيت.

عارف إحساس يوم صيفي في مكان مفتوح وأطفال كتير وحب كبير مستنيك تتسحب من البيت عشان تقابله في الجنينة تحت شجر البرتقال؟ إحساس إنك لا تحمل هم غير هتاكل إيه على الغدا؟ وهتقضي سهرتك في إيه؟ ده أقرب وصف للإحساس اللي هيوصلك لما تقرأ في الأدب اللاتيني.

في ظل ترشيحاتنا ليك قررنا ننقلك للدول اللاتينية ونرشحلك أفضل ما يمكن قراءته في الأدب اللاتيني اللي هيفتح ليك بوابة لعالم جميل مكنتش تعرف عنه حاجة.

جهز مشروبك ويلا نبدأ..


1- شجرتي شجرة البرتقال الرائعة

“لأن الحياة من دون الحنان والرقة لا تساوي شيئاً”
أول جزء من “ثلاثية زيزا” المشهورة، رواية غاية اللطف والدفء كونها على لسان طفل ذكي وشقي وحنون،

زيزا، بطل حكايتنا، طفل حالم وعقله سابق سنه، خياله واسع جدًا. بيحب السينما، وبرغم إنه بيخاف من ضرب أخواته الأكبر منه، لكنه بيكلم نفسه كأنها عصفور صغير بيسكنه وبيخفف عنه وحدته. بيشوف الخفافيش أصدقاء ليه، والقطار عنده مخلوق خارق.

بينزل الشارع ليمسح الأحذية في عيد الميلاد عشان يعرف يجيب لباباه هدية لأنه ظن أنه جرح مشاعره، ويسرق وردة من حديقة أحدهم يوميًا عشان يهديها لمدرسته في الفصل ويصاحب شجرة برتقال ويحاورها كل يوم.

زيزا ما قدرش يتحمل قلة الحنان والحب حواليه، فكان دايمًا بيدور عليهم لحد ما لقى الحنان في شخص غريب، ماكنش يتخيل يوم إنه هيبقى أقرب الناس ليه. الشخص ده اتأثر بذكاء وقوة وبراءة زيزا.

زيزا هو مثال لكل طفل لم تكن براءته لاقية الفرصة للتعبير عن نفسها، لكن في أول فرصة تتاح ليها، بتظهر بكل جمالها وبنعرف ساعتها قد إيه أهملنا رعايتها ودفناها قبل ميعادها!

الرواية ليها أجزاء تانية وهما: “هيا نوقظ الشمس” و “المخبول”.

أنصح وبشدة قراءة الرواية دي هتلاقي فيها كل البراءة والحب والحنية اللي تاهت جوا قلبك ومش لاقيها.

اطلب الرواية ورقية من هنا  iRead Shop  

2- مائة عام من العزلة

رواية “مائة عام من العزلة” تُعتبر من أهم روايات القرن العشرين، وحققت شهرة كبيرة على مستوى العالم.
كتبها جابرييل ماركيز واللي حصل على جائزة نوبل في الأدب، والرواية اترجمت لكتير من اللغات حوالين العالم ولسه بيتم إعادة طباعتها لحد دلوقتي.

أحداث الرواية بتحصل في مدينة ماكوندو الخيالية، واللي ماركيز استخدمها للمرة التانية كمكان لأحداث روايات أخرى كتبها، وبيحكي عن ازاي المدينة دي اتغيرت على مدار الزمن من خلال قصة عيلة واحدة على مدار 100 سنة.

الرواية فيها أفكار إنسانية وفلسفية بتمس كل الناس، زي الحب والشهوة، الحرب والثورة، الغنى والفقر، الشباب والشيخوخة، وكمان فكرة الخلود بعد الموت، والبحث عن الحقيقة والسلام. رغم إن العمل ضخم، أسلوب ماركيز دايمًا سهل وبسيط وواضح.


3- ساعي بريد نيرودا

اطلقوا عليها “رواية بطعم الفاكهة” من حلاوتها!
من اللحظة الاولى اللي بتبدأ فيها قراءة الرواية دي هتحس بإنجذاب شديد يخليك متسبهاش غير لما تخلصها. 

بتحكي الرواية اللي كتبها التشيلي أنطونيو سكارميتا، عن صياد شاب ساذج بيسيب الصيد ليصبح ساعي بريد في منطقة ساحلية نائية في تشيلي؛ ومفيش غير شخص وحيد اللي بيتلقَّى الرسايل ويبعتها هناك، مع الوقت بتنشأ صداقة من نوعٍ خاص بين الشاعر الكبير وساعي البريد الساذج، اتكلموا عن الحب والنساء وأسماء النساء، وعن الشعر.

رواية شاعرية مخلوطة بحس فكاهي، وعذبة من كل النواحي.


4- زوربا البرازيلي

رواية أقرب إلى الملحمة، بتدافع عن ثقافة شعب له عاداته وتقاليده وتراثه، هتقرأ فيها كتيرعن بلد رائعة بتشبه طقوس حياتها مهرجانات السامبا الملونة بالرقص والبهجة.

بتحكي الرواية عن شعب باهيا البرازيلي، وما يسكنه من تفاصيل شيقة وعادات متفردة وأحداث لا تكاد تنتهي، وشخصية “بدرو ارانجو”، رجل برازيلي يؤمن بثقافة شعبه وتراثه، وبيحارب كل اللي بيحاول يقضي على الإرث الإنساني للبلد.

شخصية بدرو ارانجو، بتشبه زوربا في شغبه وحبه اللامتناهي للحياة، وقدرته الجبارة على ممارسة فلسفة الوجود دون الحاجة للادعاء أو المبالغة.

الرواية بتعالج قضايا شائكة كتير، سواء ثقافية منها أو سياسية، واللي بيحصل في العالم من انفصال الإنسان عن هويته الأصلية، وبيخليه يوصل لمرحلة من التشابه الفارغ، لدرجة إنه بيخسر هويته الحقيقية.


5- الخيميائي – باولو كوليو

من أكثر الكتب مبيعًا في البرازيل!
تم بيع 65 مليون نسخة في جميع أنحاء العالم لتصبح واحدة من أفضل الكتب مبيعًا في التاريخ، وترجم الكتاب إلى أكثر من 74 لغة، وسجل في موسوعة غينيس العالمية للكتاب الأكثر ترجمة لكاتب على قيد الحياة .

بتدور أحداث الرواية حول شاب اسمه سانتياغو، وهو راعي أندلسي/ أسباني بيقرر يسافر يدور على كنز مدفون في أهرامات مصر، بتبدأ رحلة البحث من منزله في أسبانيا مرورا بأسواق طنجة للصحراء المصرية إلى اللقاء المصيري مع الخيميائي اللي بيدله على الطريق الصحيح عشان يوصل  لكنزه.

6- بيت الأرواح

تفاصيل حياة أجيال تحكي من خلالها تاريخ تشيلي السياسي والإجتماعي والفكري، رواية لعائلة على مدى ثلاثة أجيال وتصرفات وأعمال أفراد العائلة حسب تغير الظروف والتقدم الثقافي والإجتماعي في البلاد.

مش هتلاقي في الرواية اسم البلد أو المدينة اللي بتدور فيها الأحداث ولكن بنرجح إنها تشيلي في أمريكا الجنوبية اللي حصل فيها الزلزال اللي دمر البلاد وحدث بها انقلاب عسكري وحشي.

رواية اجتماعية تروي السحر والحبّ والدلال والجمال، من خلال الإبحار في الماضي والحاضر والتنبؤ بالمستقبل. التاريخ العسكري والتعذيب في السجون السياسية، والصراع بين معسكري الاشتراكية والرأسمالية،

مصير الشعوب المتقلّب عند تقلّب الحكّام في صراعهم على السلطة. المال وسلطته في تغيير مجرى السياسة الحاكمة،
الرواية عبارة عن تحفة أدبية، واقعية سحرية ميلودراما والجانب السياسى فيها غاية فى الجمال والألم.


7- لعبة الحجلة

تعتبر الرواية من أهم إبداعات أدب أمريكا اللاتينية، بتحمل سرد للأفكار والخواطر الأدبية لكاتبها أكثر مما تحمل عمل روائي قصصي، الرواية اترجمت لعدة لغات من وقت ما نزلت، من ضمنها العربية، وقال عنها الشاعر التشيلي العظيم بابلو نيرودا “إن من لم يقرأو هذه الرواية يعانون من مرض حقيقي غير ظاهر”.


الرواية بتتميز بالأسلوب السريالي ، في وقت كانت السيريالية الأدبية مكنتش لسه انتشرت أو اكتسبت جماهيرية، ووصفها كاتبها خوليو كورتاثر “إنها خلاصة تجربة حياة كاملة تمت كتابتها تحت إغراء نقل هذه التجربة إلى الكتب”.

من خلال السطور الأولى للرواية بيطير بينا المؤلف للبعد الآخر للواقع ألا وهو البعد الأسطوري أو البعد الذي يخرج عن الأطر العقلية على النهج الأوروبي، رواية مكونة من 3 أقسام، بياخدنا المؤلف من قسم لقسم وكأننا بنتعرف على بلاد مختلفة بناس وأفكار جديدة علينا. وهي عبارة عن تأمل طويل في تناقضات الواقع ومنظوراته المختلفة، وبحث عن معنى أرقى للحياة.

الأدب اللاتيني مش بس عن الحكايات، لكن عن الفرح، والألم، والتجارب الإنسانية العميقة. 

بنشكرك إنك وصلت لآخر المقال وبنتمنى نكون ساعدناك في اختيار كتابك الجاي، متنساش تدوس إعجاب لو المقال عجبك أو تسيب تعليق لو قدرنا نرشدك لأول الطريق في الأدب اللاتيني.