قلب في الدفاتر- وعيش التاريخ بتفاصيله

قلب في الدفاتر القديمة واعرف أصل الحكاية!

وشغل آلة الزمن عشان ترجع بيك لعصور تاريخية بدأت وانتهت من سنيين، ليه لازم تعرفها؟
عشان تفهم النهاردة لازم تفهم امبارح الأول..وده اللي هتعرفه مابين سطور 6 روايات اتبنت في وسط حكاياتها الدرامية، التاريخ بأنواعه: سياسي/ ديني/ حضاري، اخترنالك 2 من كل نوع ندردش فيهم معاك.

تاريخ ديني

1- عهد دميانة
أسامة عبد الرؤوف الشاذلي


كتاب بيحكي قصة تاريخ في نسيج أدبي خيالي مُبدع، من منظور تاريخي مختلف، هنشوف العصر الفاطمي في رحلة البحث عن هويته فوسط زحمة الصراع على العرش والإختلافات المذهبية مابين سُنّة وشيعه وصوفيه وأقباط، والتعصّب العرقي اللي دار مابين الأتراك والمغاربة، القبائل البدوية والسودانيين،

هنوصل لسؤال مهم كانوا الناس أكيد بيسألوه لنفسهم في العصر الفاطمي، ” إيه هو معنى الإنتماء؟ وإزاي أقدر أحدد إنتمائي؟”.

من المتوقع أكيد في عصر يسوده الصراعات يحصل تشتت مابين إنتماء ديني، إنتماء وطني، ولا منتمي للعرق نفسه؟، عشان كده اشتهر العصر الفاطمي بعصر البحث عن الهوية الحقيقية.

مابين تاريخ حصل بالفعل ومابين خيال الكاتب اللي نسجلنا شخصيات وأحداث خيالية دمجها مع الواقع، هتلاقيك بتسرح في قصة وسّن مع مربيتها حنة باباها مينا اللي كان عايز يجوزها بطرس، بس وسّن قلبها كان مع ويوسف بن صدقة، والحكاية هتستمر مع دميانه بنتهم وعهد يوسف لها اللي هتعرفه بنفسك لما تقرأ الرواية كاملة.

قدم الكاتب أسامة عبد الرؤوف الشاذلي التاريخ في الرواية ديه بشكل قصصي أدبي هيعيشك في زمن مابين الحقيقة والخيال.

2- أوراق شمعون المصري
أسامة عبد الرؤوف الشاذلي

في رحلة للبحث عن الأرض المقدسة، بيسجل شمعون بن زخاري النجار قصته، وفي قلب حكايته تاريخ هيمر بيك في إطار روائي بيبدأ مع خروج بني إسرائيل من مصر لحد وفاة سيدنا موسى، هتتعرف على أحوال العرب وقتها بمجهود بحثي كبير بذله الكاتب في الرواية ديه عشان يقدملنا كم من المعلومات التاريخية يخليها تتصنف من أجمل الروايات التاريخية اللي صدرت حديثاً.

بيتوه شمعون في متاهات الفكر عن الوجود والدين والإيمان مابين الشك واليقين، هتلاقيك وأنت بتقرأ بتوه معاه في التساؤلات وتبتدي تسأل نفس وتفكر معاه، إحساس الغربة اللي لازمه طول الرحلة هتحس بيه وهيوصلك معنى إنك بتهاجر بس مش عارف لسه هتروح فين؟؟! إيه هي وجهتك؟

كمل الحكاية وأنت تعرف شمعون هيوصل لفين في أوراق شمعون المصري.

تاريخ سياسي

1- ثلاثية غرناطة
رضوى عاشور

سمعت عن حد بدأ حياة جديدة من سن ال 56؟ طيب تفتكر حد يعرف يعمل كدة؟

صعب تبني حياتك سنين وفجأة يجي حد يسرق حياتك منك، ياخد كل حاجة فيها، هويتك، بيتك، أرضك، حد يجي يمسح وجودك تماماً ويستبدله بثقافته وهويته هو!

إحساس العجز صعب، والتخلي أصعب، وهنا بنتكلم على غرناطة وأهلها! عروسة الأندلس..
بين ليلة وضحاها وقعت الأندلس، وقعت وهويتها العربية وقعت معاها، هتشوف بعيون الرواية جمال الأندلس وإزاي وقعت بسبب الصراعات على الحكم اللي عمل تشتت وضعف في صفوف جيشها وروادها، هتحس بمعاناة اهلها في شخصيات أبو جعفر وعلي ومريمة، سليمة، حسن ونعيم، سعد وفضة، أم حسن وأم جعفر.

ومن أهم المعلومات التاريخية اللي هتعرفها في الثلاثية ديه، هي أهمية الكتب اللي اتحرقت وقيمة الحضارة اللي بتتسجل في صفحات الكتب، هتعرف إن أهل الأندلس كانوا بيهربوها كإنهم بيهربوا أسلحة! كانوا بيختاروها تهاجر معاهم وسايبين وراهم كل حاجة تخصم.

رواية تاريخية هتوديك تتمشى في حي البيازين، أو بين طرقات قصر الحمرا، تخيل بقى لو تشرب شاي تحت ضل شجرة “نارنج” وتقابل حد من شخصيات الرواية!

2- السرعة القصوى صفر
أشرف العشماوي

مجتمع انتهى من سنين ولكن ساب آثار لسه مستمرة مع الزمن..
في قلب جاردن سيتي قبل ثورة يوليو في وسط أسرة “سراج الدين”، هنقرب بعدسة مكبرة على طبقة معينة كانت موجودة ساعتها، طبقة جاردن سيتي اللي كانوا بيخصصوا سلم مخصوص للخدم والطباخين والسواقين مستخبي ورا البيت، ده كمان كانوا بيخصصوا ليهم أوضة متواضعة فوق السطوح عشان ميختلطوش بمجتمعهم الخاص!

التاريخ مجبش الجانب ده بس، الكاتب جاب بداية تشكيل الإخوان المسلمين وفترة عزل فاروق وموقف الضباط الأحرار، والقبضة الأمنية وقت عبدالناصر وكمان النكسة سنة 1967.

وهيربطنا مابين الماضي والحاضر ويوضح إزاي الطبقة ديه حولها الزمن وغير فيها كتير..إزاي الزمن قدر يغير في مجتمع كامل!

تاريخ فرعوني

1- هوامش التاريخ
مصطفى عبيد

إيه المقياس اللي ممكن نحدد بيه أهمية معلومة تاريخية عن غيرها؟ وليه التاريخ على مر العصور بيركز في أحداث وشخصيات بعينها، ممكن مكنتش تستحق شهرتها بس في آخر الأحوال كانت محظوظة وخدت نصيب كبير من الاهتمام.

من ناحية تانية كان فيه تاريخ اتحط ورا الكواليس وكان زي الجندي المجهول اللي ورا الأحداث، وده اللي ركز على مصطفى عبيد في الكتاب ده.

اتكلم عن قصة عبد الرحمن فهمي البطل المجهول لثورة 1919، وحادثة اغتيال كليبر على ايد سليمان الحلبي اللي الناس عملته بطل بس هتعرف من خلال السطور إنه ليس إلا قاتل مأجور، هيتكلم عن تاريخ أخطر بلطجي عدى على مصر، ياسين، اللي خلى الناس في قنا وأسوان محبوسين في بيوتهم خوف منه، وكمان هيقولك على حكاية القواد إبراهيم الغربي اللي حرر مهنة البغاء في القرن ال 19، وحكايات تاريخية وأحداث عدت على الزمن بس معدتش من مصطفى عبيد وشاركها معانا في الكتاب الجميل ده.

2- كفاح طيبة
نجيب محفوظ

في شكل غير الشكل المعتاد اللي عودنا عليه نجيب في كتاباته، هتلاقي هنا نجيب في زمن مصر القديمة لما الهكسوس احتلوا مصر، هيوصفلك كفاح الشعب ضد الهكسوس، وكفاح أحمس عشان يرجع سيادة مصر القديمة تاني لشعبها، رواية تاريخية خيالية هتعيشك في عصر الفراعنة، هتشوف نفسك بينهم وتفكرك بأعظم حضارة عدت على مر العصور. وتعتبر “كفاح طيبة” هي ختام الثلاثية الفرعونية الشهيرة لنجيب محفوظ “عبث الأقدار” و “رادوبيس” وكانت ختامها مسك!

لو عجبتك الروايات اللي في المقال، ادخل اقرأها من على iRead eBooks:

Google Play: https://play.google.com/store/apps/details?id=com.victorylink.iRead
App store: https://apps.apple.com/us/app/iread-ebooks/id6448884568