“مقامرة على شرف الليدي ميتسي” دلوقتي في القائمة القصيرة لجائزة البوكر العربية

حكاية عن القدر وخططه!
بيقامر كاتبنا أحمد المرسي بشخصياته في مشاهد الحب والحرب، الرهانات والنزاعات، الإنتصارات والخيبات، الدموع، الكبرياء، الأمنيات، اليأس وتجديد الأمل.

ووصل في سباق الرهانات بقلمه ومجهوده للقائمة القصيرة لجائزة البوكر عن رواية “مقامرة على شرف الليدي ميتسي”، والظاهر إن الرواية رهان رابح بعد ما اتعاقدت شركة سكوير ميديا للإنتاج الإعلامي للمنتج إبراهيم حمودة مع دار دوّن للنشر لتحويلها لفيلم سينمائي كلنا متشوقين نشوف مين هيجسد شخصيات الرواية والمعالجة الدرامية والسيناريو.

اللغة
لغة الرواية أكثر من رائعة ومناسبة لعصرها وكتابة لغة كل شخصية كان مثالى، رواية مصرية حديثة بجودة محترمة و مشرفة.

شخصيات الرواية
من الصبى البدوى فوزان الطحاوى بطيبة قلبه اللى تستغربها فيه من قسوة الحياة عليه، الليدى ميتسى ورقة حزنها و وحدتها، مرعى المصرى بلغة الشارع و الفهلوة اللى مع كل أخطاؤه اللى ممكن تسميها شرور ولكن لسه فيه بواقى كبرياء وإنسانية، وسليم حقى برجولته وصراعاته مع نفسه و بحر حبه لعايدة، هوا فيه منك لسه يا سليم؟!


عن الرواية
رواية ساحرة بكل معنى الكلمة، هتدخلك و تعيشك فى عالمها من خلال تشابك حيوات 4 شخصيات فكونت رواية هتسحبك لقصصهم و هتفاجئك ببساطة وسهولة سردها ولكن فيها شئ ساحر مش هيخليك تقدر توقف عن قراءتها!

بداية صادمة بموت فوزان الطحاوي الرجل العجوز واللتقليب الجاد و المحموم في  البحث في متعلقاته والكشف عن صورة بترجعنا لبداية القرن ال 20 في رحلة زمنية هنقابل فيها شخصيات الرواية ،أربع مسارات بيتقابلوا في سباق خيل وبيفترقوا في مضمار سباق الخيل .


تعليق الكاتب أحمد المرسي
علق الكاتب أحمد المرسي على تأهل روايته “مقامرة على شرف الليدي ميتسي” للقائمة القصيرة لجائزة البوكر العربية من خلال مكالمة على الهوا في برنامج “يُحكى أن” على القناة الأولى، ووصف إحساسه “بالتقدير” وده أهم شعور الكاتب بيحب يحسه من خلال تقدير عمله.


مرحلة الإعداد
بدأ المرسي كتابة الرواية في 2020 أيام الكورونا، وكتابتها تمت في خلال سنتين ونص ل 3 سنين، وبتدور الرواية عن الأمنيات اللي مبتكملش ولا بتتحقق وإزاي الإنسان بيتعامل مع الإحساس ده في إطار تاريخي في عيشرينيات القاهرة بعد الحرب العالمية الأولى وثورة 1919.


وعلى لسان الكاتب
“الفكرة بتحكم على الكاتب للعودة للتاريخ”.

وده السبب اللي خلاه يرجع بينا بالزمن لورا، وشبه المرسى بدايات القرن ال 20 وال 21 ببعض
مابين المرض اللي انتشر فجأة زي كورورنا والأزمات السياسية والأزمة الاقتصادية، وقال على لسانه إنه
” تشابه شديد نقدر نقيس عليه التجربة الإنسانية بالكامل”.

رأي الكاتب في إقبال الشباب على القراءة
شايف الكاتب أحمد المرسي الإقبال على القراءة كويس جداً خصوصاً مع وجود القراءة الالكترونية اللي بتسهل عليهم وبتوفرلهم تكاليف الكتب.


بالنص القوي، قدر أحمد المرسي يضيف للمكتبة العربية كتاب قيّم، ومن المتوقع إنه يتقدم إلى مدارج العالمية تقدير وإمتنان لقلمه وجهده ومتعة مقامرته.

شكرأ  أ/ أحمد المرسي على الهدية الجميلة ديه لُقراء iRead.

هتلاقي الرواية موجودة على https://bit.ly/3GFRnpd