أفضل 5 كتب مترمجة للقراءة المجانية على iRead eBooks

إزاي تقرأ كتب مجانية تحفظ حقوق الملكية؟

متدورش كتير طول ما معاك iRead eBooks على موبايلك!
الأبلكيشن بيوفرلك قسم كامل للأعمال اللي هتقدر تقرأها بشكل مجاني من غير أي رسوم شهرية أو سنوية، تقدر من خلالها تخوض تجربة القراءة الالكترونية عندنا وتختبر الجودة بنفسك.

الكتب المجانية عبارة عن كتب مترجمة بس؟ أكيد لأ هتلاقي في القسم كتب نفسية وروايات عربية ومترجمة وكمان كتب أطفال بس في المقال ده هناقش فيه أهم الأعمال المترجمة المتاحة ليك تقرأها مجاناً، عشان عارفين إن الكتب المترجمة غالية ومش في متناول الناس كلها !

جهز نفسك ويلا نبدأ بأول ترشيحاتنا..

1- مكبث – ويليام شكسبير

في حالة لو تعرف قصة المسرحية بس مقرأتهاش، فايتك روعة التصوير للأحداث والحبكة الدرامية ووصف شكسبير للمشاعر الدفينة للنفس، و التلاعب بالألفاظ اللي هتغرق معاها في بحر من المعاني.

ولو متعرفهاش ف أنت على معاد مع أفضل أعمال الأديب والمارد المسرحي ويليم شكسبير.

“عندما تتحرك الأشجار..و على يد رجل لم تلده امه هكذا سيتم قتلك يا مكبث”

شهوة السًلطة صعبة تتقاوم، وده الصراع اللي مقدرش مكبث يسيطر عليه لما بدأ أول جريمة في سلسلة الدم اللي كملت معاه بعد قتله للملك، وفي كل جريمة بيرتكبها بيزيد جواه إحساس الألم والندم، وكان الدافع الأساسي لارتكاب جرايمه كان إحساسه بالتهديد والخوف!

دور زوجته “الليدي مكبث” ماكنش هين! كانت المحرضة الأولى لزوجها على كل الجرايم اللي بدأها عشان يوصل للسلطة المطلقة.

احتار النُقاد في تصنيف شخصية مكبث في إنه كان شخصية شريرة ولا ضحية الغريزة والإنجرافات العاطفية والشهوات؟

اقرأها واحكم بنفسك.

2- الطاعون القرمزي – جاك لندن

ما بعد نهاية العالم!

الطاعون القرمزي أو الموت الأحمر، رواية تصنيفها خيالي لجاك لندن تم نشرها في مجلة لندن في شكل تسلسلي.

في عام 2013 أنتشر طاعون قضى على الأخضر واليابس والبشر كمان! لما محدش من العلماء قدر يتوصل لعلاج ليه، خلص على الحضارة البشرية في غمضة عين..

بيحكي القصة علي لسان جيمس سميث وهو واحد من اللي ناجيين من الطاعون بعد 60 سنة وبالتحديد سنة 2073، وبيوصفلنا من خلال السطور الرعب الذي نشره المرض، الأموات في كل مكان والمصابين اللي لونهم بيتحول  للون الأحمر وبيموتوا في خلال 30 دقيقة بس!

و بيوصف كمان شكل إنهيار الحضارة البشرية وإزاي البشر بطبيعتم كائنات همجية ظهرت بقوة في نهايتهم وديه الرسالة اللي جاك عايز يوصلها لينا من خلال روايته.

والجدير بالذكر إن جاك لندن كتب الرواية في سنة 1912 ويعتبر من أوائل الناس اللي كتبت في الموضوع ده من نظرة فلسفية ووجودية تبناها الكاتب جاك في الكتاب ده، هتستمتع بيها في تجربة وافتراضات جدلية لما بعد نهاية العالم.

3- أحزان فرتر – يوهان فولفجانج جوته

جايين من القرن ال 18 بأفضل الأعمال الأدبية الألمانية، رواية عذبة حالمة هتعيشك حالة من الجمال وكأن في فراشات بتطير حواليك…

لما بنقول فراشات منقصدش بيها إحساس الحب وبس، بنقصد بيها الطبيعة والنفس البشرية والروح المتصوفة الخطيئة وكمان الحب المستحيل إلي بيجي معاه إحساس الحزن والشجن. رواية كلاسيكية بتحكي عن الشاب فارتر اللي “حب شارلوت” حب مستحيل.

اتعرف على آلام فرتر المسكين صاحب الحس المرهف والرقيق اللي بيلاقي نفسه على حافة الرغبات العميقة لروح الإنسان.

4- جريمتا شارع مورج – إدغار آلان بو

هي قصة قصيرة كتبها إدغار آلان بو في مجلة غراهام 1841 وقال عنها آلان إنها من حكاياته الإستنتاجية واتوصفت بإنها من أول القصص البوليسية الحديثة بعد عملين سبقوه وهما “آنسة سكودري” سنة 1819 بقلم إرنست هوفمان و “صادق” اللي كتبها فولتير سنة 1747.

شخصية البطل “سي أوجست دوبان” اتميزت بصفات مميزة خلتها تكون الصفات الأدبية الأكثر انتشار للمحققين الخياليين في القصص البوليسية اللي جت بعد كدة زي شيرلوك هولمز وهركول بوارو وغيره، وهيظهر معانا البطل “دوبان” تاني في قصة “”لغز ماري روجيه” و “الرسالة المسروقة”.

بتجري الأحداث في مدينة باريس في ربيع 1800، لما اتقابلوا السيد دوبان وصديقه الراوي في المكتبة وبقوا أصحاب مقربين في وقت قصير جداً، وهتبدأ التحقيقات البوليسية لما كانوا بيتمشوا بليل ولفت انتباهم النسخة المسائية لمجلة المحاكم ومكتوب فيها خبر غريب!!  “العثور على المدام ليسبانيه وابنتها كاميل مقتولتين في منزلهما في رو مورج” والتفاصيل كانت مثيرة لدرجة مشوقة وجميلة تخليك تخلصها في قاعدة.

الكتاب أتعمل فيلمين سينمائيين وهما:

Murders in the Rue Morgue  تم إنتاجه سنة 1932.
Murders in the rue morgue تم إنتاجه سنة 1984.

5- الجمال الأسود

عمرك سمعت حصان بيتكلم؟ تعرف بيفكر في إيه؟ في الكتاب ده هتخوض التجربة وتشوف الحياة من منظور الحصان وتسمعه بصوت عالي من خلال صفحات الكتاب، لأول مرة هيكون الراوي مش إنسان بشري بيسردلك الأحداث، المرة ديه هتقرأ على لسان الحصان بنفسه المغامرة بتاعته مابين مكان للتاني.

الحصان الجميل “بلاك بيوتي” بدأ أيامه الأولى تحت رعاية مالك بياخد باله منه وبيرعاه، ولكن تأتي الرياح بما لا تشتهي السفن و يتنقل بلاك بيوتي من مالك للتاني واحنا معاه في رحلته بيحكيلنا إزاي بيعاملوه بإهمال وقسوة ومش بس كدة، “بلاك بيوتي” هيتعرف على أصدقاء في خلال رحلته وهما  “جينجر” و”ميريليجز”، هيحكلنا قصصهم وهنشوف حياتهم بعدسة قريبة من خلال الكاتبة.

الكتاب لما يعيش سنين طويلة أعرف إنه لازم في شئ مميز عن غيره، ابدعت الكتابة “’آنا” في وصف النفس واستشفت أفكارها وآلامها وقربتنا منها لدرجة إننا حطينا نفسنا مكانها، والجدير بالذكر إن الكتاب قدر يأثر الفكر العام السائد للتعامل البشري الظالم للأحصنة في العصر الفيكتوري في لندن.

لو استفدت من المقال انتظرنا بترشيحات جديدة ومشوقة دايماً هتلاقيها في قسم ترشيحات الكتب، ولو عجبتك ترشيحاتنا هتلاقي الكتب على  iRead eBooks ، نزل الأبلكيشن من اللينك ده وابدأ قراءة : https://bit.ly/3GFRnpd