ازاى تفرق بين العادة والإدمان؟

الألم الداخلي والفراغ هما أفيونة الإدمان، والفرق بينه وبين العادة شعرة رفيعة بس الشعرة دي ممكن تغير مجرى حياتك بالكامل، وفي مقالة النهاردة هشرحلك بكل بساطة و بأمثلة من حياتك اليومية على الفرق بين العادة والإدمان عشان تقدر تحدد موقفك إذا كنت مدمن ولا مداوم على عادة معينة، بناءً على مصادر موثوقة هضيفهالك في الآخر:  

الفرق بين العادة والإدمان من حيث التعريف: 

العادة:

في أغلب الكتب السيكولوجية تم تعريف العادة بأنها سلوك بيتكرر بشكل منتظم يمكن التخلي عنه دون التأثير السلبي على روتينك اليومي، “بمعنى أن العادة دي مش بتسيطر عليك إنت اللي بتقدر تتحكم فيها” 

الإدمان: 

هو سلوك بيتكرر بشكل قهري حتى لو عارف إنه بيأذيك أو بيأثر عليك بطريقة سلبية ومش قادر تتحكم فيه ولا تبطله بسهولة. 

مثال توضيحي: 

لو بتشرب قهوة كل يوم الصبح تبقى عادة. 

لو مش قادر تبدأ يومك من غيرها وبتحس بصداع وتوتر من غير ما تشربها ده إدمان.

ازاي العادة بتتحول لإدمان؟ 

العادة هي إضافة بسيطة على روتين يومك، ولكن بتتحول لإدمان لما تحصل مجموعة من التغيرات التدريجية واللي بتمر ب 4 مراحل: 

• التجربة
   في البداية إنت بتعمل العادة دي باختيارك ولكن بعد شوية بتحس انك مش طبيعي أو مضغوط لو معملتهاش مثال توضيحي: 

أول مرة “أنا هسكرول شوية قبل ما أنام “

بعد فترة ” أنا مش عارف أنام من غير لما “سكرول” 

بعد مدة أطول” أنا مش بنام بفضل سهران بسكرول 

• التضحية 

هنا بتبدأ تأجل شغلك أو دراستك وتكون مقصر في علاقاتك وصحتك بتتأثر عشان تعمل العادة دي، هنا بتتحول لإدمان، مثال: 

انت متعود كل يوم تقرأ نص ساعة قبل ما تنام، لكن لما توصل لمرحلة انك تفضل القراءة على النوم والشغل والأكل …الخ 

ده بيكون إدمان. 

• الإحساس بالذنب أو الندم

لما كل مرة تعمل العادة دي وتكون مكسوف من نفسك وتحس بالذنب والندم انك ضيعت وقتك أو أذيت نفسك، وتفضل توعد نفسك إنك تبطل ولكن مش بتقدر، وبترجع تاني لنفس العادة. 

•  الهروب من الواقع

خلينا نكون متفقين إن الإدمان هو وسيلة للهروب من مواجهة صعوبات الحياة، وده بيكون نتيجة ألم نفسي عميق، لأنك بتعاني من فجوة داخلية.  

رحلة تحول العادة إلى إدمان في عقل الإنسان؟ 

المرحلة الأولى “التجربة” 

الفضول والملل والضغط الإجتماعي بيكون هو الدافع الأول للتجربة، في اللحظة دي بيشتغل مركز المكافأة في الدماغ (Reward System)، وبيبدأ يرتفع هرمون الدوبامين المسؤول عن الشعور بالمتعة.

المرحلة الثانية “التكرار” 

كل مرة بتكرر فيها نفس السلوك الدوبامين بيرتفع تاني والمخ في الوقت ده بيبدأ يربط بينه وبين الإحساس بالمتعة فبيقولك اعمل كده تاني وهنا بتبدأ حاجه اسمها Habit Loop واللي بتكون عبارة عن دائرة: cue -Routine – Reward 

المرحلة الثالثة ” الاعتماد” 

في المرحلة دي انت بتكون من غير السلوك اللي بتعمله مش مرتاح، لأن بالوقت مخك بيبدأ يتعود ويطلب أكتر عشان يحس بنفس التأثير اللي حسه أول مرة وبالتدريج مستقبلات الدوبامين بتقل حساسيتها وتفقد السيطرة. 

المرحلة الرابعة ” السلوك القهري” 

هنا انت بتكون مدرك 100% ان الحاجة دي بتضرك بس مش قادر تبطلها، عقلك بينتقل من المخ الواعي لمناطق أعمق زي Basal Ganglia واللي بتكون مسؤولة عن السلوكيات التلقائية، بمعنى أوضح السلوك بيقى أوتوماتيك بيحصل من غير ما تفكر. 

المرحلة الخامسة ” فقدان السيطرة” 

هنا انت مش بتختار هنا السلوك الإدماني هو اللي بيحركك، بيحصل خلل في الدوبامين الطبيعي وتدهور في مركز اتخاذ القرار، الإدمان بقى وسيلة للهروب من المتعة، بتدخل في دوامة من الإحساس بالذنب، الإنكار والهشاشة النفسية، كمان هلوسة وشكوك وتوتر. 

من أين تبدأ رحلة التعافي من الإدمان؟ 

خلينا نتفق ان من الضروري الاعتراف بأن عندك مشكلة سواء كان ادمانك سلوكي أو مادي، والقرار هنا مش بيكون مجرد قرار حماسي لحظي، لا ده بيحتاج خريطة تعافي واضحة، ودول أهم المحطات فيها: 

أول خطوة: 

 احنا اتفقنا ان الإعتراف أهم حاجه، الاعتراف مش انك تقول لنفسك “أنا عايز أبطل، الاعتراف هنا بأن عندك مشكلة حقيقة محتاجه مجهود 

 ثاني خطوة: 

حدد السبب اللي بتلجأ ليه عشان تعمل العادة دي، وهنا لازم تكون صريح مع نفسك في الإجابة وتجاوب على ال3 اسئلة دول: 

• ليه بتلجأ لها؟ 

• بتهرب من إيه؟ 

• إيه الفراغ أو الألم اللي بتغطيه؟ 

ثالث خطوة هتبدأ تشيل وتقطع التواصل بينك وبين أي إغراءات، مثلا لو العادة مرتبطة بالموبايل قلل استخدامه على قد ما تقدر، أو لو مرتبطة بأماكن أو أشخاص، غير روتينك اليومي. 

رابع خطوة، وهي تحديد هدف يومي بسيط. يوم بيوم كده حط هدف صغير، يعني مثلا لو بتعمل السلوك ده مرتين أو تلاتة في يوم حاول يكون مرة أو اتنين بحد اقصى؟ وتحاول تملى فراغ السلوك السلبي بعادة جديدة تكون أفضل زي القراءة ومش لازم تبدأ بكتب أو روايات كبيرة ممكن تبدأ بحاجات بسيطة، نزل ابلكيشن iRead eBooks هتلاقي عليه أقسام مختلفة ومليانة كتب وروايات تقدر تقرأ منها اللي تحبه. دوس هنا 

خامس خطوة، استعد للانتكاسات لأن الوقوع في المرحلة دي مش معناه فشل، والانتكاسة بتكون جزء من التعافي مش نهاية الطريق.  

اسمع دايمًا نفسك وكافئها كل ما تتقدم في خطوة التعافي حتى لو كان التقدم ده بسيط، والأهم انك تسامح نفسك لو وقعت في نص الطريق، لأن التعافي مش خط مستقيم، ده مليان مطبات والمهم انك تكمل. 

واخيراً الإدمان مش بالضروري يكون للمخدرات ممكن تكون مدمن على عادة معينة انت فاكر انها صحية ولكن بتأذيك بشكل أو بآخر وده بيكون نتيجة لألم داخلي بتحاول تهرب منه، المدمن مش فاسد أخلاقيًا المدمن، لأن الإدمان غير مرتبط بفساد أخلاقي بل هو وسيلة للهروب من ألم نفسي عميق. 

المصادر 

كتاب ممتلئ بالفراغ للدكتور محمد رشاد عثمان اقراءه على iRead eBooks دوس هنا

APA (American Psychological Association) – Understanding Addiction 

Everitt & Robbins, “Drug Addiction: Updating Actions to Habits to Compulsions”, Annual Review of Psychology.

Koob & Le Moal, “Neurobiology of Addiction”, Elsevier,.

Charles Duhigg, The Power of Habit.اطلبه من هنا