تقييم اللغة في الروايات موضوع له مدرستين عكس بعض، والسؤال اللي بيجي في دماغ أي كاتب شاب بيسأله قبل ما يكتب حرفه الأول:
“اكتب لغة عامية ولا عربي فصحى ولا أدمج ما بين الإتنين؟”
المدرسة الأولى بتقولك إنك عشان تحافظ على التراث الأدبي العربي، لازم تكتب بلغة عربية فصحى وياحبذا لو اخترت كلمات تقيلة وغير دارجة عشان تستعرض مهاراتك اللغوية وكأنك مايسترو المعجم العربي، كل ما تتقل في الجمل كل ما روايتك تكون تقيلة وليها وزنها وسط الرفوف.
لكن عيب المدرسة دي ظهر في بعض الروايات بشكل واضح، وهو التركيز على اللغة وحقن الرواية بتعابير وكلمات صعبة وغير دارجة وبيتم إهمال العناصر الأساسية الباقية (الفكرة، الشخصيات، الحبكة والصراع، الزمان والمكان، الراوي والحوار، والأسلوب)، بالتالي الرواية بتطلع دسمة جداً لغوياً فقط بينما العناصر الأخرى مبتلمعش وبتكون ضعيفة، لدرجة إن صعب الرواية تعلم مع القارئ.
أما المدرسة التانية بتقولك خفف تسد، كل ما تنزل باللغة للشارع، ناس أكتر هتفهمك، وفئات عمرية مبتقرأش هتخليها تقرأ، بس السؤال الأهم:
“المهم تقرأ وخلاص، ولا تقرأ إيه؟”
هنا الكيف لازم يكون أهم من الكم، طبيعة اللي بنقرأه إيه؟ وبعدين احنا سبنا الشارع ولجأنا للكتب، نلاقي الكتب نفسها نزلت الشارع!
في الحالتين المبالغة في التقدير بتبوظ البناء والأثر، مهم نواكب وقتنا بس مهم برضه نحافظ على إرثنا!