حفل تكريم استثنائي لفائزين iRead AWARDS

النهاردة 19 فبراير 2024 تم اطلاق حفل تكريم استثنائي للنسخة الرابعة من iRead AWARDS 2023

لتكريم الفائزين في مسابقة القصة القصيرة ومسابقة تصويت الجمهور لإختيار الأفضل.

بحضور الكاتب والسيناريست/ أحمد مراد وأعضاء مجلس إدارة مؤسسة iRead، الحفل تم بشكل خاص جدًا وقررت إدارة iRead اقامة الحفل ده بعد الغاء احتفالية النسخة الرابعة بسبب الأحداث البشعة اللي حصلت في فلسطين من يوم 7 أكتوبر.

شعار النسخة الرابعة كان #كلمات_كتبوها_عشانك بهدف تشجيع “الكلمة” لأن الكتابة ليها أشكال كتير، بس التأثير هيفضل واحد، إنها تعبر عنك في الوقت اللي انت محتاجه.

وعن iRead AWARDS

هو حدث بيضم مسابقات أدبية وفنية، وبيهدف لتكريم أكبر الأدباء وكمان الكُتاب الصاعدين، وتسليط الضوء على المواهب اللي لسة بتبدأ أول خطواتها في عالم الأدب والفن، وتقديم فرصة ليهم في مشوار حياتهم الأدبية والفنية، وتساعد الجمهور يعبر عن صوته ويختار مين كان الأفضل بالنسبة له في عالم الأدب والكتابة.

عن حفل التكريم الاستنثاني

تم تكريم الفائزين في مسابقة القصة القصيرة وهما

1. نورهان ممدوح سابق عن قصة جلسة اعتراف
2. احمد سيد عبد الغفار عن قصة الخطيئة الثالثة
3. نسرين خليل عن قصة أحزان فاوست
4. محمد قناوى صديق عن قصة قصة مٌرة
5. شاهيستا احمد محمد عن قصة آرشى
6. يوسف خليل طوسون عن قصة العرض الأخير
7. محمود السيد كمال عن قصة اللعنة
8. ملك حسام الدين  عن قصة زيارة استثنائية
9. وليد أحمد أحمد شحاتة عن قصة وقت ضائع
10. صاحب المركز الأول – محمد محمود أحمد عن قصة التقرير النهائي

وحصل صاحب المركز الأول على جائزة مالية قدرها 30,000 جنيهًا مصريًا

عن مسابقة القصة القصيرة

هي مسابقة بتتعمل كل سنة لكتابة القصص القصيرة واكتشاف كُتاب صاعدين، ولجنة التحكيم بتقيم وتختار أفضل 10 قصص وبيتم نشر القصص في كتاب من أعمال iRead الأصلية على أبلكيشن iRead eBooks.

استقبلنا السنة دي أعداد كبيرة جدًا ولجنة التحكيم قرأت وقيمت واختارت 10 فائزين، وتكونت لجنة التحكيم من الكاتب أحمد القرملاوي، الكاتب مصطفى عبيد، الناشرة أميرة أبو المجد.

أعمال iRead الأصلية:

• 2019 – “غموض في مصر القديمة” -كتاب ورقي
• 2020 – “ليالي الكورونا” – كتاب ورقي
• 2021 – “اليوم الأخير” – كتاب ورقي
• 2022 – كتاب “كانت هتفرق” – كتاب إلكتروني
• 2023 كتاب 59 دقيقة – كتاب إلكتروني

كتاب 59 دقيقة:

هو أحدث أعمال iRead الأصلية وموجود حصريًا على أبلكيشن iRead eBooks،

وموضوع الكتاب ليه أبعاد نفسية، وأحداثه بتدور جوة عيادة! عن زيارة مش عادية بيقوم بيها مريض أو مريضة لعيادة دكتور أمراض نفسية وعصبية، الزيارة دي بينتج عنها أحداث غير متوقعة خالص!

ممكن الزيارة دي تكون الأولى أو الأخيرة! وممكن تكون دراما، رعب، فانتازيا، أكشن، جريمة وغموض.

اقرأ الكتاب حصريًا هنا

مسابقة تصويت الجمهور

صوت الجمهور هو التتويج الحقيقي لأي عمل ناجح أثر فينا والتصويت السنة دي أكبر من كل اللي فات!

مسابقة تصويت الجمهور لإختيار: أفضل كتاب، عمل أدبي صاعد، دار نشر، وأفضل صانع محتوى.

وتم تكريم الفائزين في مسابقة تصويت الجمهور لإختيار الأفضل:

أفضل كتاب وحصل عليه الكاتب محمد الصاوي عن رواية القتل بالكلمات

أفضل عمل أدبي صاعد وحصلت عليه الكاتبة دعاء أبو العلا عن رواية لا أسألك الرحيل

أفضل دار نشر وحصل عليها دار تشكيل للنشر والتوزيع

أفضل صانع محتوى وحصل عليه أحمد سمير

عن مؤسسة “iRead”

“iRead” أكبر مجتمع عربي للقُراء والكُتاب. المؤسسة اللي وصلت لأكتر من مليون قارئ.

بدأت في 2019 بهدف واحد وهو إننا نعيد زمن القراءة أعظم وسيلة قدر بيها الإنسان ينقل معرفته جيل ورا جيل، وده من خلال مبادرات ومشاريع وأحداث تشجع القراءة والكٌتاب والثقافة بشكل عام.