خلي بالك من عقلك!
في مقولة بتقولك “خلي مخك غالي ميشغلوش إلا العزيز”
احنا بقينا نفكر في كل حاجة، هنلبس إيه النهاردة؟ هفطر إيه؟ هنعمل إيه في اليوم؟ ألبس الجزمة السودا ولا البيضا؟
هو الراجل ده بصلي كده ليه؟ هي تقصد إيه بالكلام ده؟ أنا هعمل إيه في الإجازة؟
في دراسات علمية بتقول إن معدل قرارات الإنسان في اليوم مابين 30000 ل 35000 قرار في اليوم الواحد!
وده بيحمل ضغط كبير على المخ لأن مع كل قرار لازم يفكر في أبعاده ويقارنه ويحلله، وهياخد معاه في الرحلة ديه أصدقائه “القلق، التوتر، الخوف، التشتت” وبندخل بقى في دوامات تانية أكبر وأوسع من “أنا هاكل إيه النهاردة؟”
في مصطلح في طب النفس اسمه “إرهاق القرار” وده بالظبط اللي بتعمله في نفسك كل يوم، ومن كتر الضغط النفسي اللي بلا داعي تلاقي نفسك بتقطع في شفايفك وضوافرك ووشك قالب 111، وفي آخر اليوم بتلاقي نفسك بتاخد قرارات سريعة ومتهورة وغير مدروسة لأن مخك تعب وبقى مرهق من كل القرارات الضخمة اللي بيفكر فيها طول اليوم.
مش لازم كل حاجة تقررها في يومك، افطر اللي بتفطره كل يوم أو اللي نفسك راحتله من غير تفكير بلا داعي، البس الجزمة اللي لايقه على لبسك او مريحاك مش لازملها قرار، ريح دماغك واديها فترة راحة طالما مفيش شئ طارئ يستدعيها تكون حاضرة في كل صغيرة وكبيرة.
مخك عزيز، متشغولش في كل حاجة، انتقي الأشياء اللي تستدعي تفكر فيها عشان يفضل دايماً بصحة كويسه، خلي بالك من عقلك!
on العلم المرحكتاب ممتع انصح به
on أحلام ممنوعةكتاب جميل جدا
on رفقاء الليلكتاب رائع- on انستا_حياة#كتاب رائع
- on أنت فليبدأ العبثكتاب رائع
