مجموعات قصصية تستحق القراءة
المجموعات القصصية ليها مكانة خاصة في قلب كل قارئ، بتخليك تعيش جوه أكثر من حدوتة في نفس الوقت، بتضحك وتبكيك واحيانًا بتلاقي فيها حكايتك، وكثير من الكُتاب بيستلهموا حكايات القصص من ناس حقيقة بيقبلوهم في حياتهم اليومية، عشان كده بتوصل لقلوبنا بسرعة ومن غير مقدمات، والنهاردة هرشح ليك كتب فيها مجموعات قصصية متنوعة
حواديت محلية الصنع
مجموعة قصصية مكونة من 16 قصة مستقلة بذاتها، بتدور حوالين قيمة البشر وقسوة الظروف والبحث عن الخلاص والحب ومشاعر كثيرة الإنسان بيواجها كل يوم، مكتوبة بأسلوب جميل وخفيف يخليك تقع في غرام طريقة سرد الكاتب ” علاء أحمد” اللي بتجمع بين البساطة والعمق.
إعادة تدوير الشغف
مجموعة قصصية مكونة من 18 قصة قصيرة، من أول قصة هتغرق في بحر من الذكريات والأفكار اللي بتدور في بالك وحتى ثوران وانتفاضة عقلك وتمردك على الوضع اللي عايش فيه، هتفتح باب الشجن اللي جواك عشان تعيد تدويره مرة ثانية لجرعة أمل، بقلم الكاتبة سهى زكي.
أنا وأنت
مجموعة قصصية عبارة عن 15 قصة قصيرة، بيتكلم عن مواقف ومشاعر مختلفة زي مأساة أولاد الشوارع، وأزمة منتصف العمر، الأمل وقسوة الفراق، واقع الأسرة المصرية من الجد للحفيد، طريقة السرد ممتعة بقلم الكاتب أحمد الخميسي اللي كتبها بطريقة خفيفة التعقيد وشديدة البساطة.
موت مع إيقاف التنفيذ
10 قصص قصيرة هتعيش معها حيوات متنوعة لناس مختلفين، بالرغم من أن الموت هو عنوانها إلا أن الكلام عن الموت هو محاولة لفهم الحياة، بقلم الكاتب طارق عز.
قميص لتغليف الهدايا
مجموعة قصصية من 17 قصة مختلفة، بتجسد المخاوف البشرية، زي الخوف من الوحدة، الذل، الفقد، المجهول، الموت، هتلاقي هاجس نفسك في كل قصة كأنك واقف قدام مراية، بطريقة سلسة وأسلوب جميل من قلم الكاتب أحمد القرملاوي
رأيت البحر
20 قصة حقيقة حدثت بالفعل مع الكاتب من أشخاص قابلهم في حياته، القصص مليانة بمشاعر أشخاص حاولوا يدروا على إجابة سؤال ” من أين يبدأ الطريق؟” برؤية إنسانية وطريقة سرد شيقة قدر الكاتب أحمد لطفي يسيب أثر في كل قصة.
احتمالات لا نهائية للغياب
في قلب القاهرة داخل حي الغايبين 10 قصص منفصلة لبنات بيجمهم مكان واحد وهو سور مجرى العيون، بس في أزمنة مختلفة، ولكن ليه اختفوا وأيه قصة ضريح خضرة وليه الحي ده ملعون؟ حكايات هتشدك من أول كلمة، بقلم الكاتبة آية الطنطاوي.
الكشكول لا يزال في جيبي
حضر فنجان قهوتك واستمتع ب20 قصة مختلفة ما بين الحنين للماضي والتربية الخاطئة وقسوة الأمم والرثاء وأزمة منتصف العمر والرومانسية وغيرها من القصص، بطريقة بسيطة قدرت الكاتبة منى رضوان تدمج ما بين الدراما والأغاني والقهوة عشان تقدملك تجربة قراءة ممتعة
ثور هائج
قصص متتالية خفيفة على القلب من شريط ذكريات المؤلف، من بين حياته مع أسرته والناس اللي قابلهم في بلده بداية من طفولته و الكوميديا والمواقف العشوائية إلى المواقف الناضجة والتأثير النفسي للموت عليه وعلى باقى الشخصيات، هيتعيشك الجو الريفي المصري بكل تفاصيله، بقلم الكاتب هشام شعبان.
طرف من خبر الايام
مجموعة قصصية بتتميز بدمج الخيال مع الواقع بطريقة ساخرة، في وقت البشر بيختلطوا بالروبوتات بالقرود ف بيتوه الإنسان في وسط كل دول، بقلم الكاتب جمال زكي مقار.
أعظم كاتب في العالم
مجموعة قصصية بأفكار فلسفية تشبه حياتنا اليومية، لدرجة تخليك تفكر في القصة وتندهش وهو ده المطلوب، عشان تحصل على المتعة من القراءة، الكوميديا حاضرة بشكل جميل وغير مبتذل في طريقة كتابة المؤلف ميشيل حنا.
خمس ورقات
مجموعة قصصية قصيرة، مبينة على واقع المواطن المطحون في دروب القاهرة، يغلب عليها الطابع الكوميدي الساخر، بأسلوب سلس وبسيط هتفصلك من زحمة يومك بشوية دردشة على القهوه بقلم الكاتب محمد العريان.
كشكول المجهود الشخصي
في 45 دقيقة هتعيش جوه مجموعة من الحكايات، ما بين الطلاق والزواج والعلاج النفسي والحب، روح الفكاهة بتغمر كل القصص بقلم الكاتبة منى رضوان
بالصدفة والمواعيد
مجموعة قصصية بتتكلم عن لعبة الصدفة في حياة المؤلف، مواقف أشخاص أحداث وحكايات وقعت في محيطه بالصدفة، محاولات الالفة لشخص مغترب في بلد اجنبي، وذكريات الطفولة واللعب، جدعنة ابن البلد وغيرها من القصص الملهمة، بعض القصص بالفصحى واخرى بالعامية المصرية، بقلم الكاتب حسام فخر.
شارع التبليطة
مجموعة قصصية بتتكلم عن الحارة المصرية، ورصد حال المواطن المصرى بكل التحولات اللي مرت عليه، بكل تقلباته وانعكاساته على أبطال القصص الواقعيين، بقلم سمير الفيل
لو بصيت على حياتك بنظرة عميقة هتلاقيها عبارة عن مجموعة قصصية مليانة بالحكايات والأحداث المختلفة بإختلاف الزمن والناس اللي بتقابلهم في كل فترة، وأخيرا وليس آخرًا استمتع بكل حدوتة في حياتك من قلبك بحلوها ومرها حتى لو كانت النهاية حزينة أو سعيدة أو لو حتى مفتوحة، اقلب الصفحة واقرأ الحدوتة اللي بعدها.
on العلم المرحكتاب ممتع انصح به
on أحلام ممنوعةكتاب جميل جدا
on رفقاء الليلكتاب رائع- on انستا_حياة#كتاب رائع
- on أنت فليبدأ العبثكتاب رائع
