أكتر حاجة بتخلينا نكسل نبدأ قراءة هي حجم الكتاب وعدد صفحاته، ونفضل نتساءل هو احنا هنعرف نخلص كل ده؟! أو نقول احنا هنخلصه في قد إيه ده !
بس السؤال الأهم هنا هو ليه بنختار روايات طويلة طالما عندنا روايات عدد صفحاتها قليل وممكن نخلصها في وقت قصير؟
في المقال ده جمعنالك 10 روايات مهمين تقدر تقرأهم ومتكسلش ولا تبعد عن القراءة لفترات طويلة.
ليه اخترنالك الروايات ديه؟ هنقولك عشان الروايات ديه حازت على قراءات عالية على iRead eBooks وتقييمها كان أعلى من غيرها.
يلا نبدأ بأول رواية…
العائش في الحقيقة – نجيب محفوظ
نجيب محفوظ بعبقريته المتفردة سافر بينا لعصر إخناتون، الملك المارق زي ما بيقول عنه أتباع أمون، اللي ثار على تقاليد مُلك آبائه وأجداده وكهنة طيبة، في سبيل إيمانه العميق المترسّخ بالإله الواحد.. حاول بكل قوته إنه يبني دولة أساسها الحق والعدل والتوحيد ويهدم أركان عبادة الشرك والفجور والكذب.. وتصبح دولة حب وخير،
بس يا إخناتون، هل دولة الحب المخلص النقي ممكن يتحقق في عالم البشر؟ ولا العروش والسلاطين مبتقومش إلّا بالظلم والجور والخداع؟!
نجيب محفوظ هيبهرك كعادته بأسلوبه المفريد المميّز في سرد وقائع حكايات تاريخية من زمن الفراعنة.. والرواية مبنية على شهادات من القريبين من إخناتون وعاصروه طفلاً وملكاً ومنهم زوجته نفرتيتي
..
مع نجيب محفوظ هتحس وكأنك جزء من رواياته، وتكاد فعلاً تلمس شخصياته بإيديك، وتحس أنها حقيقية جداً، وتكاد تتكلم معاها وتناقشها، وهنا يتجلّى أحد أوجه إبداعاته بإستخدامه اللغة الرصينة والحوار العميق والوصف اللي بيفوق الوصف.
رواية تستحق وقتك وقراءتك.
مزرعة الحيوان – جورج أورويل
رواية أبطالها حيوانات في مزرعة، جورج أورويل نقل الواقع بكابوسيته، وخلى التاريخ أكثر قابلية للفهم، وشرح لنا باختصار إزاي ممكن يتحول الإنسان إلى خنزير والخنزير إلى إنسان!
جورج اورويل عام 1943 يقدم لنا نموذج لثورة، ثورة حيوانات علي “صاحب المزرعة” عشان حقوقهم، الحكاية هنا حكاية ثورة
ثورة من اجل حرية حقيقية..ثورة من اجل الكرامة..ثورة من اجل العدالة الاجتماعية..ثورة نجحت في ازالة الضاغية…ثورة نجحت إنها تخلي الأرض كلها للثوار..بقت ارضهم وملكهم..خيرها كله بقى ليهم.. فرحين بحريتهم..ولكن زي نهاية أي ثورة إنسانية حصلت في التاريخ حصلت برضه في المزرعة مع الحيوانات.
رواية رمزية عميقة أكيد تستحق وقتك.
المحاكمة – فرانز كافكا
رواية كابوسية تخليك تفكر في الأسئلة الوجودية التي بتطرحها الرواية وتعيد التفكير في النقط المتعلقة بالعدالة والانسانية والعبث، الثواب والعقاب، قوة الشر وضعف الخير!
بتحمل بين سطورها إسقاطات فلسفية عميقة تندرج ضمن الفلسفة العبثية ووجودية الإنسان في العالم المليء بالمتاعب والألم
يتم تصوير الأحداث غير الواقعية بطريقة تبدو واقعية للغاية كما يحدث في الكابوس.
في الرواية ديه بيتم تصوير الأحداث الغير واقعية بطريقة تبدو واقعية، بيتحرك البطل ضمن احداث بتبدأ باعتقال جوزيف في يوم عيد ميلاده ، وتنتهي في اليوم اللي تم فيه حكم الإعدام طعنا بالسكين واللي بيوافق ليلة عيد ميلاده ..
الأمير الصغير
كل طفل بيرسم العالم اللي حواليه بطريقته وبيضع هالة من السحر والغموض حوالين كل حاجة بيشوفها وبيعرفها، وبيبدأ يسأل كتير ويستفسر عن الأشياء والتفاصيل، ولكن الطفل ده بيتصدم لما مبيلاقيش الإجابات اللي مستنيها من الكبار! وده لإن معظم أسئلة الأطفال وجودية وصعب الكبار يلاقوا ليها إجابة.
وده كان حال أميرنا الصغير اللي بيسافر من كوكب لكوكب وبيتعرف على ناس كل واحد فيهم مشغول بعمل شئ خاص بيه بيخلي الأمير الصغير يسأل أسئلته عن كينونة العمل ده وإيه أهميته، بيستمتع في خلال رحلته برؤية المشاهد الجميلة والعناية بزهرته وتنضيف براكين كوكبه، بيحب يضحك ويكون مبسوط، وبيستغرب أن الناس متعرفش أن الجمال بيكمن في أبسط الأشياء اللي حواليهم.
الأجنحة المتكسرة
من أشهر ما كتب جبران خليل جبران من روايات وقصص باللغة العربية، قصة حب بيكتبها جبران بلغة عاطفية كلها رومانسية ، بيبدع فيها وبيسرد بقلمه قصة
حب أليمة متكتبلهاش نهاية سعيدة لبنت اسمها “سلمى كرامة” اللي بيضطر والدها يزوجها بغير إرادتها لشخص طمعان في ثروتها وفي حين إنها بتحب فارس اللي مقدرش ينساها حتي النهاية…
“الأجنحة المتكسرة” حكاية بقلم جبران وريشته الجميلة والرقيقة، بتخرج عن إطار العادية فبتخليك تطير معاها كإنك طير حُر.
عائد إلى حيفا
يعني إيه وطن؟
عارف إيه هو إحساس مواطن فلسطيني حُر؟ إحساس هيدخل جوا قلبك بدون إستذان، جرعة من السخط على الواقع ووجعه، غسان كنفاني مش هيطلعك من الرواية ديه من غير ما تدمع، تبكي، قلبك ينزف من الألم!
الرواية ديه بتحكي مآساة أسرة من حيفا , فرّقها الاجتياح الاسرائيلي عام 48, عجزوا الأب والأم إنهم يسافروا بطفلهم، وفضل الطفل يتربى وسط أسرة صهيونية، وبعد عودة الوالدين كان قدامهم حقيقة مُرة كانوا عارفين إنهم هيواجهوها لما يرجعوا أراضيهم!
القلعة الزرقاء
روايةٌ هتاخدك جولة عميقة داخل المجتمع الإنساني، هتفصله وتوضحلك تناقضاته وتكشف خداع مظاهره ببراعة نادرة.
في يوم هتقرر فالنسي ستيرلنغ إنها تنحرف عن الطّريق اللي المجتمع رسمهولها، لتنحت بإرادتها الخاصة اللي هي عايزاه بعيد عن كل الضوابط اللي حكمتها طوال ال 29 سنة اللي عاشتهم.
رواية هتخليك تعيد النظر في المفاهيم اللي اتأسست في عقلك من زمان ومخدتش وقتك تفهمها صح بمعانيها الصح، لا الحب هو حب بجد، ولا الحرية حرية ولا القيم قيم، هتخليك ترجع تسأل نفسك تاني عن المفاهيم الكبرى وترتب أفكارك وتعيد النظر في الوجود حواليك بحثاً عن قلعتك الزرقاء.
جريمة العقار47
خلطه مثيره من الغموض والجريمه والفانتازيا في كناب واحد!
في ظل الجو العائلي اللطيف مابين صفاء الام المصرية الجميلة وولادها زيد ونيلي وزوجها فاضل، في الشقة المقابلة لبيتهم هتحصل فيها جريمة قتل، بتبدأ صفاء وبنتها نيلي في البحث ورا الجريمة وهيكتشفوا الأسرار الخفية اللي بتدور في الشقة.
وبتلاحظ صفاء بطلة قصتنا بقدرتها عن طريق برنامج على موبايلها انها تقدر تتعرف على مشاعر الناس لكن السؤال هنا:
هل هتقدر تستفيد من القدره دي على كشف القاتل؟ ولا دي مجرد هلاوس؟ بالذات انها مصابه بأمراض نفسيه.
مذكرات نشال
المعلم عبدالعزيز النُص أشهر نشال في التسعينات، كتب مذكراته وراح للأستاذ حسني يوسف صاحب جريدة لسان الشعب وطلب منه انه ينشر مذكراته زي ما نشر قبل كدا مذكرات “الفتوة أبو الحجاج يوسف”،
والمذكرات ديه عبارة عن مغامرات النُص فى النشل و الفلوس اللي سرقها، مين أساتذته فى المهنة وازاى بدأها وتوبته، النشل عالم كبير ليه قانون ونقابة وقاموس لغوي وأصول، الكاتب وضحها بطريقة سرد خفيفة وبسيطة وكوميدية، كمان الكتاب بيضم بعض الأخبار عن النشل والنشالين من المجالات القديمة.
غداء في بيت الطباخة
في البداية أنت مش عارف مين دول، اتنين اتقابلوا في خندق، وسط حرب، أنهي حرب؟ مش معروف، طيب أنهي دولة؟ مفيش برضه، طيب دول جنسيتهم إيه؟ محدش عارف.
الرّواية عبارة عن فصول، في فصول بتسردها الحرب نفسها عن نفسها، عن رؤيتها الذّاتية ووعن البشر صراعاتهم واختلاف أشكال الحروب والحياة، وفصول بين اتنين اتقابلوا في خندق الحرب، كل واحد فيهم جرح التاني، وقعدوا 5 أيام في الخندق، يتكلموا عن حاجات كتيرة تخص حياتهم، وهنعرف إن واحد منهم طبّاخ والتاني مدرس تاريخ.
لو وصلت لحد هنا سيب كومنت باسم الكتاب اللي شدك أكتر من ال 10 دول، وتابع ترشيحاتنا اللي جايه.