أعراض انسحاب: إزاي تتخلص من شعورك للشخصية الخيالية
الموضوع مش مُحرج ولا سر لأننا كلنا بنتعلق بشخصيات خيالية سواء في كتاب أو فيلم أو مسلسل أو حتى من دماغنا، دايماً فاكر نفسك لواحدك اللي بتتخيل الشخصية ديه، وساعات بتسأل نفسك: هو أنا مجنون ولا إيه معقول أنا متعلق بشخصية مش موجودة في الحقيقة؟َ!
بنطمنك إنك في كامل قواك العقلية وكلنا هذا الشخص بإختلاف درجة التعلق بالشخصية. وهنا بتبدأ المشكلة لو درجة تعلقك بيها زادت عن الحدود الطبيعية، وبقيت تسرح بخيالك معاها في أوقات شغلك أو دراستك أو حتى ماشي بتفكر فيها وسرحان وأنت سايق عربيتك أو ماشي في الشارع،
لما الموضوع يوصل لكدة يبقى أنت لازم تنسحب بهدوء وتتخلص من إحساسك تجاها الزايد عن اللزوم، هنقولك خطوات تساعدك في المقال ده.
– اكسر صورتها المثالية في عقلك الباطن
لازم تعرف إن مفيش حد مثالي وحاول تطلع عيوب في الشخصية ديه، طبيعي طالما شايف إن شخصيتك الخيالية ملهاش عيوب لازم تتعلق بيها تعلق مرضي، وعشان تتخلص من الإحساس ده لازم تخلقلها عيوب زي بقيت البشر عشان عقلك ميشوفهاش شخصية مثالية.
– أنقل تركيزك مع رواية جديدة بشخصيات جديدة
تركيزك التام مع الشخصية القديمة هيخليك تفكر فيها كتير، واللي هيشتت تركيزك هو إنك تبدأ رواية جديدة تتعرف فيها علي شخصيات جديدة وكأنك بتبتدي صفحة جديدة مع كتاب جديد وده هيساعدك تتخلص من تعلقك بالشخصية الخيالية.
– شغل دماغك في الشغل أو الدراسة ومتخليش في وقت كبير فاضي في يومك
طول ما دماغك شغالة في أمور الشغل أو الدراسة هتتعب منك ومش هيكون في طاقة تفكر في حاجة تانية ولا وقتك يسمح، وبكده تكون قللت المدة اللي بتفكر فيها في شخصيتك الخيالية، وكده بدأنا نطلع من التعلق المرضي واحدة واحدة.
– اسمع iRead بودكاست وسلي وقتك
مواضيع البودكاست وضيوفنا اللي بنحبهم كلنا هيتناقشوا مع بعض وهيسلوا وقت فراغك بدل ما تفكر في شخصية مش موجودة في الوجود، وبكده هتكون شغلت كل وقت اليوم من أوله لأخره.
– كفاية بقى!
كفاية تعمل شير لكل ما يخص الشخصية الخيالية ديه، وكفاية تتكلم عنها في كل جروب للقراءة تدخله، وحاول تكون أنت الرقيب على نفسك لأن طول ما هتتكلم عنها طول ما هتفضل في دماغك وتفكيرك.
– خليك في وسط الزحمة
حاول تتجنب الإنعزال والإنطواء على نفسك واخرج مع صحابك ومعارفك وجرب تجارب ومغامرات جديدة وسافر وابدأ كون حياة حقيقية لنفسك تقدر تكتب عنها حكايات ومواقف ظريفة.
– شعورك بالحزن مقبول
إحساس الفقدان بيزود إحساسنا بالحزن والوحدة، حتى لو كان الفقدان ده لشخصية خيالية، وفي أعراض الانسحاب هتحس بالمشاعر ديه وده أمر طبيعي لازم تمر بيه وتاخد الوقت اللي أنت محتاجه عشان تخرج كل الطاقة السلبية اللي جواك وتبدأ تفكر بشكل واقعي أكتر وسليم.
– واجه نفسك بالواقع
لازم تفكر نفسك في آخر خطوة إن الشخصية ديه مش حقيقية وتكررها كتير في دماغك وتقولها بصوت مسموع عشان تواجه نفسك بالحقيقة وتكون إنسان واقعي أكتر عارف يفرق مابين الحقيقة والخيال.
وفي الأول وفي الآخر إرادتك القوية هي الدافع الأقوى اللي هيخليك تنفذ ال 5 خطوات دول بسهولة ومن غير ما تغش!
احنا في iRead يهمنا نساعدك في أبسط الأمور اللي بتيجي على بالك ونتمنى نكون ساعدناك في المقال ده بالخطوات اللي تخليك تتخلص من تعلقك المرضي للشخصية الخيالية. لو عجبك المقال سيب تعليق وقولنا مين الشخصية الخيالية اللي عايز تتخلص منها.
on العلم المرحكتاب ممتع انصح به
on أحلام ممنوعةكتاب جميل جدا
on رفقاء الليلكتاب رائع- on انستا_حياة#كتاب رائع
- on أنت فليبدأ العبثكتاب رائع
