الجواب مفهوم من عنوانه: اعرفها من كاتبها المفضل
“عايزة ورد يا إبراهيم”
نبدأ كلامنا بلسان الفنانة “هند صبري” للفنان القدير الراحل “خالد صالح”.
الورد جميل وبيفرحنا أكتر من الهدايا والمفاجآت، إحساس رقيق صعب يتوصف و تأثيره قوي، الورد حل مشاكل كتير وصراعات وجمع ناس مع بعضها كانوا ممكن يتفرقوا لو مكنش واحد فيهم خد المبادرة وجاب ورد ولطف الجو…
بس في مشكلة صغيرة، إن احنا كستات مش زي بعض، مش كلنا عايزين إبراهيم يجبلنا ورد، ممكن نبقى عايزين شيكولاتة، تذكرة سفر، تذكرة لفيلم رعب، رحلة لمكان جديد مليان مغامرات..وحاجات كتير تانية.
وده اللي ممكن تعرفه من طبيعة الكتب اللي احنا بنقرأها، و اللي بنفضلها ولينا كاتب مميز فيها وبنستناله أعماله الجديدة على نار.
تعالى نعرفك علينا أكتر من خلال المقال ده
“شيكولاتة”
لما نيجي نتكلم عن جرعة الدوبامين للسعادة يبقى أكيد سيرة أ/ نور عبد المجيد لازم تتجاب، الكاتبة اللي بتخلينا نلاقي مشاعر عندنا مكناش نعرف إنها موجودة جوانا اصلاً، في كتاباتها بنعيط شوية ونضحك شوية وأوقات تانية بنحس فيها إننا طايرين من على الأرض!
وكأنها شيكولاتة بتواسينا في أوقات حزننا وتدوبنا في حلاوتها زي مابندوب في المشاعر اللي بتقدمهالنا في أعمالها، حساسة ورقيقة وأي حرارة بسيطة بتسيحها، عشان كده بنكون حريصين جداً واحنا معانا شيكولاتة في الشنطة أو في العربية، وبالرغم إنها رقيقة إلا إنها غالية وقيمة وكله بيقدرها كويس. وده توضيح سريع يفهمك الشخصية اللي بتقرأ للأستاذة نور عبد المجيد، وأكيد كده عرفت إيه أنسب هدية ليها.
“تذكرة سفر”
السفر عامل زي الملف السرّي..هيفضل غامض طول ما أنت لسه مفتحتهوش وشفت اللي فيه. الكلام عن البلاد غير إنك تسافرها وتكتشفها بنفسك، وسواء تذكرة سفر أو ملف سري في الأخر هنروح لمؤلفة الأعمال البوليسية نهى داوود، اللي بتقدملنا قضية غامضة منعرفش عنها حاجة ونبدأ نكتشفها مع بعض مكان مكان وحدث حدث عشان نوصل لإنطباع نهائي نقدر نحسم بيه الموضوع.
اللي بتقرأ لنهى داوود لازم تاخد بالك من كلامك وتصرفاتك كويس جداً لأنها هتركز في التفاصيل وبتسجل كل كلمة بتقولها وهتربط كل حاجة ببعضها عشان تطلع منك بأنطباع معين، شخصية ذكية، عندها سرعة بديهة وإحساس عالي للبحث والاستكشاف. متنساش إن أنسب هدية ليها هي تذكرة سفر لمكان مسافرتلوش قبل كدة.
“تذكرة لفيلم رعب”
إحساس التشويق والغموض ده مزاج ميفهموش غير اللي بتقرأ لشيرين هنائي، تذكرة لفيلم رعب هتكون ألطف حاجة ممكن تقدمهالها، ويسلام لو حضرت معاها الفيلم وشاركتها اهتمامتها!
النوع ده من الستات هتلاقيها قوية مبتتهزش بسهولة..عاملة زي ثمرة جوزالهند، من برا هتعورك بس لو عرفت تتعامل معاها صح هتلاقي أحلى جوزهند مستنيك، تلميذة د.أحمد خالد توفيق ونبيل فاروق نجحت في الإمتحان وأثبتت جدارتها في الرواية الرعب وده بيكسر الاعتقاد إن للرواية الرعب ليها أصحابها وإن إحساس المرأة صعب ينتج عمل دموي أو رعب، شيرين هنائي طمنتنا إن الرواية الرعب هتكمل وإن لسه في أعمال جايه نعيش معاها زي مابنعيش مع الفيلم الرعب ونندمج معاه.
“رحلة هدية”
الرحلات الجديدة اللي مليانة تجارب ومغامرات بتعرفنا اكتر عن نفسنا وبتخلينا نطلع برا الإطار المحدود اللي رسمناه حوالينا ومش بنطلع منه، روح المغامرة بتعيشك جو من التشويق والغموض فحياتك وبتخليك تنجرف ورا التجارب الجديدة والغير معلومة، زي القفز الحر من طيارة..تسلق جبل موسى أو غيره..تسافر في رحلة تخييم في الصحرا..
لو هي بتقرأ لميرنا المهدي فا لازم تعرف إن عندها روح التحقيق والاستقصاء اللي هتلاقيه في التجارب الجديدة اللي هتقابلها في الرحلة،
وعلى إثر أجاثا كريستي.. ظهرتلنا أعمال ميرنا المهدي البوليسية عشان تحط لنفسها بصمة في تاريخ الروايات البوليسية اللي بتعتمد على الاستكشاف والمغامرة اللي مش بنشوفوا كتير دلوقتي ومحتاجين أعمال منه أكتر وأكتر عشان نحلها ونعرف الحكاية كاملة!
في يوم المرأة العالمي بنختم المقالة بكلمة “أنت فريدة” عشان مش كلنا واحد، اهتمامتنا مختلفة، هوايتنا وقدراتنا فردية، عشان كدة لو دورت في المعجم مش هتلاقي جمع لكلمة “مرأة” لأن كل واحدة غير! كل سنة وانتم مختلفين ومميزين.
on العلم المرحكتاب ممتع انصح به
on أحلام ممنوعةكتاب جميل جدا
on رفقاء الليلكتاب رائع- on انستا_حياة#كتاب رائع
- on أنت فليبدأ العبثكتاب رائع
