القراءة للمخضرمين فقط!
عشان تبقى قارئ جيد مش مضطر أنك تقرأ “مئة عام من العزلة، أو تفهم فلسفة نيتشه عشان تنضم لنادي القراء المخضرمين، اللي تحسهم اخدوا توكيل القراءة الجيدة بعقد احتكار، وبيتشرطوا عليك تقرأ إيه ولمين وازاى تقرأه، وإيه المغزى من النص وفلسفته، مع أن القراءة أسهل وأبسط من كدا بكتير.
في مديح القارئ السيئ:
الكاتب مكسيم ديكو ليه كتاب اسمه “في مديح القارئ السيئ” بيتكلم فيه عن 3 أنواع من القراء السيئين وهما:
- النوع الأول القارئ العقلاني: اللي بيحكم العقل في قراءة النص وبيفسر كل حرف وكلمة، ومن مساوئ القراءة دي هي عدم الانغماس والتعمق في النص وفهم القصد الأدبي منه.
- النوع الثاني القارئ الهاوي: وهو اللي بيفك شفرات النص على حسب هواه، وممكن يتأثر بالنص لدرجة أنه يقلد حياة بطل الرواية زي ما حصل في أوائل القرن ال19 لما بعض الشباب اتأثروا برواية غوته (آلام الشاب فيرتر) وقلدوا لبس البطل في الألوان الزرقاء والصفراء حتى الانتحار كان موضة بسبب تأثر القراء بحادثة انتحار البطل.
- النوع الثالث القارئ الفتيشي: وهو القارئ اللي بيقدس كل ولائه واهتمامه لكاتب معين أو كتاب معين تقديس أعمى سواء بالحب أو بالكره.
الكتاب ناقش أنواع مختلفة للقراء واللي ممكن تكون أنت وأنا واحد منهم، ولكن اللي أقدر أقوله إن مفيش حد معداش بمراحل القراءة دي من أول ما كنا متيمين بالأحداث ومتأثرين بيها جداً ولحد ما بدأنا نفك شفرات النص ونفهم المعنى والبعد الأدبي والنفسي ليه، كمان عندنا كتاب أو رواية مفضلة بنفضل نرشحها لكل الناس اللي نعرفهم أو بندافع باستماتة عن كاتب أو طريقة كتابة معينة.
روتين قراءة هينفعك لو بتشتغل أو بتدرس:
لكن في وسط زحمة الأيام مع الشغل والدراسة بننسى أننا بنحب القراءة، وبالرغم من بعدنا عنها بنرجع تاني كل فين وفين نقرأ صفحة في كتاب، ونوعد نفسنا أننا هننظم وقتنا ونرجع حبنا وشغفنا بالقراءة والانغماس في أحداث الروايات، بس اللي بيحصل عكس كدا بنقرأ صفحتين ونرجع تاني في دوامة الأيام، بس أنا لاقيت الحل في روتين قراءة سهل وبسيط تقدر تعتمد عليه حتى لو بتشتغل أو بتدرس:
- أول خطوة أنك تحط هدف معقول للقراءة يعني مثلا كتاب كل شهر
- اختار الكتاب يكون بلغة سهلة وبسيطة وقصير عشان متزهقش منه بسرعة
- إقرأ 30 صفحة في اليوم
- خلي القراءة هي أول حاجة تبدأ بيها يومك بدل ما تسكرول على الموبايل وآخر حاجة في يومك قبل ما تنام وصدقني هتحسن جودة نومك من أول مرة.
هتلاقي هنا ترشيحات كتب وروايات هتساعدك تختار الكتاب أو الرواية المناسبة ليك سواء ورقية أو eBookds
ده كان روتين سهل وبسيط ممكن تبدأ بيه عشان ترجع تاني شغفك للقراءة، وخليك دايمًا فاكر أن القراءة مش بالعدد أو بأسماء الكتاب، القراءة هي عادة وهواية وهدفها هو المنفعة مع التسلية.
فريق iRead كتب المقالة بكل الحب عشان يشجعك على القراءة بانتظام، أنت تستاهل أنك تثقف نفسك وتبسطها، شكراً لأنك وصلت لحد هنا.
on العلم المرحكتاب ممتع انصح به
on أحلام ممنوعةكتاب جميل جدا
on رفقاء الليلكتاب رائع- on انستا_حياة#كتاب رائع
- on أنت فليبدأ العبثكتاب رائع
