تعرف على مسابقة مكتبة وهبان الجديدة

أعلن الاستاذ إسلام وهبان عن مسابقة أكتوبر لأعضاء جروبه الثقافي “مكتبة وهبان”.

وذلك في منشور من خلال الجروب:

دايما بنحاول في الجروب إننا نقدم خدمة ثقافية مميزة وحقيقية للقراء، حتى المسابقات بنحاول من خلالها نفيد القارئ ونوفرله الكتب ونسهل عليه اقتناءها والاستمتاع بيها، وبخلاف الحصول على الكتب بنهتم جدا في الجروب نطور من قدرات القارئ للتعبير عن الأعمال اللي قراها وتحسين قدراته اللغوية والنقدية والقرائية

عشان كدة بمبادرة طيبة من الكاتب والناقد طارق إمام اقترح عليا فكرة مسابقة عظيمة، وجايزتها عظيمة جدا مقدمة منه هو شخصيا والهدف منها تطوير قدرات القارئ على فهم النصوص الأدبية ونقدها بأسلوب مميز

المسابقة هتكون طوال شهر أكتوبر، وهتكون لأفضل ريفيو أو مراجعة خلال الشهر وهيفوز صاحبها بقسيمة شراء مقدمة من الكاتب والناقد طارق إمام، قيمتها 1000 جنيه.. أيون ألف جنيه مصري زي ما قرأت بالظبط

يعني تقدر تشتري بيهم مجموعة قيمة من الكتب من إحدى المكتبات اللي هنحددها لاحقا وتختارهم بنفسك طبعا.

كل عضو خلال شهر اكتوبر هينزل ريفيوهاته عن الكتب اللي بيقراها تحت هاشتاجات #أفضل_ريفيو_في_أكتوبر و #محبي_مكتبة_وهبان والريفيوهات دي هيقوم أ. طارق إمام بتقييمها بنفسه واختيار أفضل ريفيو من بينهم وفقا للشروط التالية

شروط المسابقة

– ألا يقل الريفيو عن ٤٠٠ كلمة
– أن يكون الريفيو بالفصحى أو أقرب للفصحى
– أن يكون مصحوبا بغلاف للعمل وهاشتاجات #أفضل_ريفيو_في_أكتوبر و #محبي_مكتبة_وهبان
– ألا يكون الريفيو عن أي من روايات الكاتب طارق إمام نهائيا
– ألا يحتوي الريفيو على أكثر من ثلاث اقتباسات على الأكثر. يعني بلاش الريفيو يبقى عبارة عن اقتباسات وبس
– محاولة أن يكون الريفيو على شكل فقرات قدر الإمكان
– لا يوجد حد أقصى لعدد الريفيوهات للعضو

زي ما قولت ا. طارق إمام هو اللى هيقيم الريفيوهات ويختار أفضل ريفيو منهم، وهيقدم للفايز قسيمة شراء للكتب قيمتها ألف جنيه

وكمان أعلى ريفيو هيحصل على تفاعل من الأعضاء سواء لايكات أو كومنتات بس تكون حقيقية هياخد جايزة تانية مقدمة من مكتبة وهبان عبارة عن مجموعة كتب واشتراك 3 شهور في منصة ستوريتل للكتب الصوتية. يعنى هيبقى فيه 2 فايزين معانا، فائز بالمسابقة الأصلية وفائز باختيار الجمهور.

حقيقي كل الشكر للكاتب العزيز جدا أ. طارق إمام على المبادرة الهايلة دي وعلى قيمة الجايزة وعلى رغبته في تطوير مستوى وعي وقدرات القارئ النقدية واللغوية وإصراره إن المسابقة تبقى للقارئ مش عن أعماله دي لافتة هايلة. أتمنى التجربة تخرج بأفضل شكل ممكن ونكررها بمشاركة كتاب تانيين

للاشتراك من هنا https://www.facebook.com/groups/maktabetwhban/?ref=share