كام مرة كان ممكن تخسر فيها أعز أصدقائك بسبب حرقه لأحداث رواية كان نفسك تقرأها، أو نهاية مسلسل انت لسه في بدايته، أو ممكن تكون أنت الشخص اللي بيحرق الأحداث وأنت مش واخد بالك، عشان كده في مقالة النهاردة هديلك سر المهنة وهقولك الدليل الصحيح لكتابة مراجعة للرواية بدون حرق وكلها تشويق، ورقة وقلم ويلا بينا.

الفرق بين المراجعة التشويقية للرواية وحرق الأحداث؟ 

الفرق بين المراجعة وحرق الأحداث بيتمثل في مقدار التفاصيل اللي هتكشف عنها وايه تأثيرها على القارئ، بمقارنة بسيطة هوضحلك الفرق: 

مراجعة الرواية 

المراجعة التشويقية للرواية، هدفها هو تقديم رأي نقدي أو انطباع عام عن الرواية بس من غير ما تحرق الأحدث، لكن ازاي تعمل كده؟، من خلال انك تتكلم عن أسلوب الكتابة، الشخصيات، الأجواء، الرسائل العميقة والمشاعر اللي الرواية بتتكلم عنها، مثال: 

” تطور الأحداث في الرواية مشوق جدًا، النهاية غير متوقعة، الشخصيات معقدة وفيها تفاصيل كثيرة” 

حرق الأحداث

حرق الأحداث بيتم من خلال الكشف عن تفاصيل الحبكة الرئيسية أو المفاجأت المهمة في الرواية “Plot twist”، يعني ممكن تقول البطل هيموت في نص الرواية، تحل لغز الرواية والتفاصيل الرئيسية اللي فيها، متخليش شغفك في مناقشة الرواية، يحرق أحدثها. 

ازاي تكتب مراجعة صحيحة للرواية؟ 

كتابة مراجعة الرواية بتتطلب التوازن بين حاجتين أساسيتين، وهما التقييم النقدي وعدم حرق الأحداث مع تقديم رؤية واضحة عن جوانب الرواية، وده مش هيتحقق غير بالخطوات دي: 

1. المقدمة “معلومات الرواية الأساسية”:
   * عنوان الرواية واسم المؤلف.
   * تاريخ النشر.
   * تصنيف الرواية (دراما، رعب، خيال علمي،..الخ).
   * فكرة عامة عن القصة من غير حرق.

مثال💡
رواية (أولاد حارتنا) للكاتب “نجيب محفوظ” من إصدار جريدة الأهرام سنة 1959، الرواية فلسفية، بتدمج بين الواقع والأسطورة في حكاية من قلب الحارة المصرية.

1. الحبكة والشخصيات “بدون حرق”
   * أسلوب السرد ( سريع – بطئ – معقد – بسيط …)
   * جو الحبكة ( مترابطة – فيها مفاجأة – متوقعة …)
   * الشخصيات ( واقعية – سطيحة – معقدة – مؤثرة …) 

مثال💡 

السرد، بيعتمد محفوظ على أسلوب الحكي الشعبي، حبكة الرواية قوية جدًا لأنها بتدور حوالين الصراع بين القوة والحرية، الجهل والمعرفة، القهر والعدل، لكل شخصية في الرواية رمزية بتعبر عنها وده اللي بيخلي الرواية تفتح في خيالك تفسيرات كثيرة، الرواية مش بس بتتكلم عن ولاد الحارة، هي بتتكلم عن رمزية تطور الفكر الإنساني والبحث عن العدالة من خلال الحارة المصرية. 

3. الأسلوب واللغة
   * هل أسلوب الكاتب جذاب ولا ممل؟
   * هل اللغة المستخدمة مناسبة لنوع الرواية؟
   * اقتباس عجبك من الرواية

مثال💡 

الأسلوب بسيط ولكن عميق، ومليان معاني خفية، لغة الحوار بتدمج بين السرد الأدبي والأسلوب الشعبي وده اللي بيخليها قريبة جدًا من اللي بيقرأ، وأكثر اقتباس سايب علامة وأثر حتى الآن هو “آفة حارتنا النسيان”. 

4. التقييم الشخصي للرواية 

• هل الرواية عجبتك؟ 
• ايه الحاجه اللي تتمني لو كانت أفضل في الرواية؟ 
• ترشح الرواية دي لمين؟ 
• التقييم النهائي 

مثال💡
” أولاد حارتنا” بالنسبالي هي تجربة فلسفية عميقة، تقرأها وتتأمل فيها عشان تفهم معانيها ورمزية أحدثها، عجبتني طريقة محفوظ في دمج الأسطورة بالواقع، وده اللي خلاني أفسر الرواية في خيالي بأكثر من طريقة، ممكن يكون السرد بطئ في بعض الأجزاء ولكن الرواية جميلة جدًا وتستحق وقتك، فـ لو أنت من محبي الأدب الفلسفي هتقع في غرام ” أولاد حارتنا”، الرواية بالنسبالي تاخد (*****) 5 نجوم وأكثر كمان. 

ازاي تتجنب حرق الأحداث؟

لنفرض انك نفذت كل الخطوات السابقة، ولكن بردو لسه فيه عندك معلومة مهمة عايز تقولها ومش عايز تحرق الأحدث، هتعمل إيه؟، 

• استخدم أسلوب التحذير:
  لو كنت مضطر انك تقول تفاصيل مهمة ممكن تحذر اللي هيقرأ المراجعة انها فيها حرق للأحداث مثال
  المراجعة تحتوي على حرق للأحداث”  

• اتكلم بشكل عام:
  بمعنى انك توصف الأحداث مثال: ” في نص الرواية هيحصل فيها تحول مش متوقع للأحداث هيغير فكرتك تمامًا عنها”  
• ركز على المشاعر:
  بدل ما تتكلم عن الحدث نفسه، أوصف الشعور اللي وصلك منه ومدى تأثيره عليك مثال “وأنا بقرأ حسيت بحنين لذكريات في طفولتي معينة” 

ختامًا، حاول على قد ما تقدر انك تكتشف رمزية الرواية والبعد الفلسفي ليها، وتشرح المشاعر اللي وصلت ليك لما قرأتها، عشان زي ما أنت استمعت بيها، غيرك كمان حابب يستمتع بيها، ولو حابب تشوف مراجعات أكثر دوس هنا 

اقرأ أكثر من 10 آلاف كتاب من هنا، وهستنى منك مراجعة للرواية، بتطبيق الخطوات اللي اتكلمنا فيها