مسلسل إمبراطورية ميم رمضان 2024

إمبراطورية ميم بثوبها الجديد!
إمبراطورية قامت من سنين بقلم الكاتب الكبير إحسان عبدالقدوس، وعشان القصة الحلوة مابتموتش، هنشوف إميراطورية ميم من تاني بثوبها العصري الجديد.

ولأن توقعاتنا عالية، الرهان السنادي هيكون صعب بس مش مستحيل مع ممثل قوي زي خالد النبوي، ومخرج شاطر زي عمرو سلامة ومؤلف حقق نجاح كبير السنة اللي فاتت بمسلسل “راجعين يا هوى”، كل الأسماء ديه تخلينا مستنيين العمل اللي مر عليه سنين طويلة ودلوقتي دخل عملية الإنعاش من أول وجديد.

العمل الأصلي لإمبراطورية ميم قصة ولا فيلم؟
العمل في الأساس هو قصة قصيرة عبارة عن 15 صفحة بإسم “إمبراطورية ميم” في كتاب قصص قصيرة بعنوان “بنت السلطان” للكاتب الكبير إحسان غبد القدوس.

والقصة بتتكلم عن أب اسمه “محمد مرسي” ل 6 أبناء، ققروا يتمردوا على سلطته عليهم ويطالبوه بعمل إنتخابات ديمقراطية نزيهة داخل البيت مابينهم واللي هيكسب هو اللي هيكون مسؤول عن قرارات الأسرة، وطبعاً مع الضغط الأب أضطر يوافق على طلبهم وعملوا الإنتخابات فعلاً وهنا كانت المفاجأة لما عرف إنهم صوتولوا رغم إن هما اللي كانوا معترضين على إدارته في الأول، وهنا هنفهم إن الحاجة لما بتيجي بإرادة حرة غير اللي تحس إنها مفروضة عليك من غير حرية الاختيار.

الجدير بالذكر إن قصة “إمبراطورية ميم” بتناقش حرية التعبير عن الرأي عند الشباب المعاصرين واختلافهم عن جيل ماقبل السيتينات، ومن هنا حصلت الثورة الفكرية اللي كان إحسان عبد القدوس سبب إننا نلاحظها ونسد الفجوة اللي حصلت مابين الجيلين والفرق الواضح بينهم في طريقة التربية والتفكير واسلوب التعامل.

الفرق بين القصة والفيلم
الفرق بين قصة “إمبراطورية ميم” عن الفيلم إنه كان أب مع أبناءه ال 6 وهنشوف في الفيلم إنها أم مثلتها النجمة الراحلة وسيدة الشاشة العربية فاتن حمامة سنة 1972  ، وشاركها التمثيل هشام سليم وأحمد مظهر إخراج حسين كمال، وزودت فاتن حمامة لمستها الأنثوية الخاصة في السيناريو عشان يطلعلنا بالجمال اللي شفناه ولسه بنشوف الفيلم لحد دلوقتي وبنستمتع بيه.

مسلسل “إمبراطورية ميم” رمضان2024
نرجع للوقت الحالي اللي مستنيين فيه مسلسل “إمبراطورية ميم” اللي مأخوذ عن قصة قصيرة لإحسان عبد القدوس، قررت شركة أروما للإنتاج الفني للمنتج تامرمرتضى إحياء القصة وتحويلها لمسلسل تلفزيوني في شهر رمضان لسنة 2024 ببطولة خالد النبوي وسيناريو ل”محمد سليمان عبد الملك” وإخراج عمرو سلامة، وشارك في التمثيل الفنانة حلا شيحا والممثلة الكوميدية نشوى مصطفى  ومن الممثلين الشباب نور النبوي ومايان السيد.

إعلان المسلسل

أعمال أدبية في رمضان 2024
حابين نفكركم إن “إمبراطورية ميم” مش العمل الأدبي الوحيد اللي هينافس في رمضان، هتلاقي مسلسل “عتبات البهجة” بطولة النجم القدير يحي الفخراني مأخوذ عن رواية للكاتب إبراهيم عبد المجيد  بنفس اسم الرواية بمعالجة درامية بقلم مدحت العدل.

هنختم المقال بمقولة لجبران خليل جبران “ولادكم ليسوا لكم، أولادكم أبناء الحياة المشتاقة إلى نفسها، بكم يأتون إلى العالم، ولكن ليسوا ملكا لكم” وبنتمنى المسلسل يعجبكم وكل سنة وأنتم طيبين، رمضان كريم عليكم.