10 أسباب ليه القراءة هي أفضل ونس للوحدة؟

بداية من مقولة اختار الصديق قبل الطريق، واللي كان معنى الصدق هنا مُتمثل في الكتاب، ولحد أغنية صاحب لمسار اجباري ” اللي بالمناسبة ” معنى الصاحب فيها هو بردو الكتاب ” لانها  كانت أغنية إنطلاق ” iRead”، فتعتبر العلاقة بين القارئ وكتابه مش مجرد شخص بيقرأ وخلاص، لأن الكتاب هنا يُعتبر صديق مثالي، بيودك لأماكن مختلفة ويعرفك على ناس جديدة، بتختبر مشاعر مختلفة في فصول حياته، بتزعل لحزنه وتفرح لنجاحه، بس قبل ما  تسند راسك على شباك الميكروباص وتبدأ أغنية الفنان  محمد منير “كل شيء بينسرق مني .. العمر والأيام”، هقولك على 10 أسباب ليه القراءة هي أفضل ونس للوحدة؟ 

• توفير الصُحبة دون الحاجة إلى تفاعل مباشر 

يعني ايه الكلام ده، أحيانًا بتكون محتاج لصاحب أو حد يتكلم معاك ولكن من غير ما تعمل أي مجهود تفاعلي اجتماعي، وده طبعًا استحاله يحصل لو بتتكلم مع الناس، لكن القراءة هتديلك التوازن اللي محتاجه، هتستمع بصحبه شخصيات الرواية ولكن من غير ما تبذل مجهود وطاقة في الرغي والتفاعل.

• السفر عبر الزمن 

أوقات كتيرة بتحس انك مضغوط ونفسك تسافر لأماكن بعيدة وتعزم نفسك على قهوة، القراءة في الحالة دي  بتخليك تسافر لأماكن وأزمنة مختلفة، سواء كنت بتقرأ رواية خيالية أو سيرة ذاتية أو حتي كتاب علمي، وده هيخليك تعيش حكاية الشخصيات وتتعمق في تفاصيل العصر اللي كانوا بيعشوا فيه، وثقافته وعاداته وتقاليده، ودي حاجه ممكن تحسسك انك مش لوحدك. 

• تنمية الخيال والإبداع 

القراءة وخاصًة في الأدب والروايات، بتوسع الخيال والأفق الإبداعي، لأنك مش بتتفرج على مشهد جاهز زي الأفلام، بالعكس لما بتقرأ انت بتتخيل الأحداث والشخصيات بنفسك، وده بيخليك تنسى شعور الوحدة، وتبدأ تتخيل المشهد اللي في الرواية ده ممكن يكون ازاي، ياترى الشخصية دي لبسها أو طريقة كلامها ازاي، ملامحها ..إلخ  

• تحفيز نشاط العقل 

أحيانًا الوحدة تؤدي إلى الكسل الذهني، ودور القراءة هنا هيخليك تحافظ على نشاط عقلك، لأنها بتتطلب التركيز، التفكير، وكمان ربط المعلومات والأحداث ببعض، وده هيقلل الإحساس بالخمول عندك.

• توسيع دائرة المعرفة والوعي

دايمًا الشخص اللي بيقرأ بتحس انه عنده معلومات جديدة ومش منتشرة زي اللي على السوشيال ميديا، وفي موضوعات مختلفة ما بين الفلسفة، التاريخ، وحتى علم النفس والفضاء، والقراءة في الموضوعات المختلفة بتوسع الأفق وبتحسسك انك محاط بعالم واسع وكبير من الأفكار والمعلومات حتى لو انت قاعد لوحدك. 

• تقليل التوتر 

القراءة وبالتحديد في الكتب أو الروايات اللي بتناقش قضايا علم النفس والإجتماع، بتخليك تحس انك قاعد في جلسة نفسية، فيها أفكار عميقة وبتعرفك على نفسك وعلى الناس وطريقة تفكيرهم وأنماط شخصياتهم المختلفة، ودي أكتر حاجه بتقلل التوتر والقلق. 

• تغيير طريقة التفكير في الحياة 

لما بتقرأ تجارب الآخرين سواء في الروايات أو الكتب الواقعية، بتبدأ تشوف الحياة من زاوية تانية خالص غير اللي انت متعود عليه، بتخليك تفهم نفسك أكتر والأهم انك تفهم الآخرين، وده بيقلل الشعور بالوحدة. 

• تحسين مهارات التواصل والتفكير النقدي 

حتى لو بتقضي وقت طويل مع نفسك، فالقراءة بتخلي عندك مفردات وأسلوب خاص بيك في الكلام والتعبير عن مشاعرك، وده هيطور من قدرتك على التواصل بثقة لما بتتكلم مع الناس، كمان القراءة بتعزز مهارات التحليل والتفكير النقدي. 

• الشعور بالإنجاز والرضا

إحساس جميل بالإنجاز لما بتخلص كتاب أو رواية، بتحس بنوع من الثقة بالنفس وأنك حددت هدف وحققته، ودي حاجة مهمة جدًا خصوصًا لو بتقضي وقت طويل مع نفسك. 

• إمكانية القراءة في أي وقت وكل مكان

شعارنا في iRead، هو صاحبك اللي دايمًا معاك في أي وقت وكل مكان، لأن القراءة هي الحاجة الوحيدة اللي دايمًا معاك وبتونسك، سواء في القهوة، المواصلات، الكافية، على البحر، وحتى على سريرك، كتابك دايمًا معاك سواء بتحب تقرأ ورقي أو الكتروني. دوس هنا ونزل الأبلكيشن 

ختامًا، القراءة مش بس وسيلة ترفيهية، هي بوابة لعوالم لا نهائية، ووسيلة لمكافحة الوحدة، لكل اللي عايز يفهم نفسه والحياة بشكل أعمق، هتلاقي في الكتب الصديق اللي عمره ما هيخذلك أو يتجاهل وجودك.