5 علامات للرواية اللي مش هتنقلك لمرحلة جديدة: هل تقرأ ما يستحق؟”
- ضيعنا وقت كتير واحنا بنقرأ روايات مش مناسبة لينا، بس إحساس القارئ اللي جوانا بيرفض يسيبها ولازم يكملها للآخر، ولما نيجي للآخر بنندم على وقتنا اللي ضيعناه ونقول يارتنا ما قرأناها.
وساعات بنكون مغيبين تماماً واحنا بنقرأ رواية قد تبدو عليها إنها ذو أهمية وفي الآخر لو سألنا نفسنا طب أحنا طلعنا منها بإيه مش هنعرف نجاوب.
في المقال ده هنقولك على 5 علامات للروايات المسمومة وكمان هنقولك على أسس لازم تكون في دماغك وأنت بتقرأ أي كتاب عشان متقعش في الفخ!
1- “السم في العسل”
النوع ده من الكتب بيكون معتمد على الإثارة على حساب المحتوي الجيد..يعني إيه الكلام ده؟
معنى العسل هنا، هو الاحساس اللي بيخليك مشدود للكتاب بشكل يخليك عايز تخلصها في قاعدة واحدة..ده كمان ممكن تفضل إنك تكملها عن إنك تنام عشان تشوف مصالحك الصبح، وتخليك تنسى تاكل أو تأجل وجبتك لحد ما تخلصها!
العلامات دي ممكن تكون دليل قوي لمهارة الكاتب في تشويق القارئ وإثارته من طريقة السرد العبقرية، ودي حاجة تُحسب نقطة لصالحه مش ضده، ولكن..ي جي دور السم هنا، إن مفيش محتوي!
إزاي تعرف النوع ده من الروايات؟
الرواية مكونة من العناصر اللي تخليك تكلمها للآخر وهما:
– التركيز على الأحداث والأكشن بدل الفكرة: الرواية هتكون مليانة أحداث مثيرة ومتسارعة، مش هتركز على الفكرة أو الرسالة اللي عايزة توصلها. يعني كل شوية يحصل حدث جديد عشان يخليك مشدود، لكن مفيش تحليل أو عمق فكري.
– الأسلوب السردي المغري: الأسلوب ممكن يكون جذاب ويجذبك تكمل، زي العسل اللي يوقعك في فخ السرد السهل والممتع، بس في النهاية هتحس إنك مش هتلاقي حاجة جديدة أو قيمة حقيقية.
– السرعة الكبيرة في الأحداث: الأحداث في الرواية هتكون سريعة ومتسارعة، وكل ما تكمل هتحس إنك مش قادر تسيب الكتاب لدرجة إنك ممكن تبقى مش مهتم بالوقت، لكن بعد ما تخلص، هتدرك إن مفيش محتوى يضيف حاجة لحياتك.
– وطبعاً مش هننسى العناصر اللي بتشد أي قارئ: وهما الدخول في التابوهات التلاتة وإثارة الجدل لاستفزاز وتحفيز القارئ إنه يكملها من باب الفضول والاتطلاع على وجة نظر الكاتب.
ولكن لما تيجي تدور على القصة نفسها مش هتلاقي:
– فكرة ثرية بتدور حواليها القصة.
– مش هتلاقي بلاغة في الأوصاف.
النوع ده من الروايات ممكن يبقى ممتع عشان الإثارة والتشويق، لكن غالباً مش هيديك فكرة جديدة أو محتوى قيم. هتحس إنك قريت حاجة بسرعة بس مش هتستفيد منها بعد ما تخلصها.
خلاصة المعنى هو استخدام في النوع ده من الروايات، الأسلوب التجاري وليس الفني، وده بيكون الهدف من البداية، إذا كنت بتدور على النوع الفني، يبقى النوع ده حتماً مش ليك ولكنه قد يناسب نوع آخر من القراء.
2- “اخر الزمر طيط”
تسويق الروايات شئ مهم عشان تتعرف وتطلع للنور، بس في نوع من التسويق الاسود، زي كده السوق السودا، بيتم التسويق لها وتقديمها للجمهور بشكل لا يمت لحقيقتها بصلة!
إزاي تعرف النوع ده من الروايات؟
– التسويق للرواية بشكل مبالغ فيه: عدد السنوات اللي اتكتبت فيها.. الأبحاث اللي اتعملت والمصادر اللي الكاتب دور عليها في جبال الهيمالايا، ورحلته في توثيقها في القطب الشمالي، المبالغة في وصف ما وراء كتابتها دليل قوي يخليك تتوجس من قرائتها.
لو الرواية اتقدمت على إنها “أفضل رواية هتقرأها في حياتك” أو “رواية لازم تقرأها لو بتحب الإثارة”، دي علامة خطر. يعني التسويق بيعتمد على شعارات كبيرة، لكن من غير ما يوضحلك حقيقة الكتاب. كأنهم بيعتمدوا على العنوان أو الأسلوب عشان يثيروا فضولك.
– المراجعات المزيفة : لو لقيت كتير من المراجعات اللي بتقول “الرواية دي غير تقليدية” أو “هتغير حياتك”، وغالباً بتكون مراجعات حماسية جداً من أشخاص مش معروفين أو مدفوع لهم. دي علامة على إن فيه تسويق مش شفاف بيحاول يجذبك للمحتوى بشكل مش حقيقي.
لو لقيت رواية مروج لها بشكل كبير جدًا أو مغري لدرجة مبالغ فيها، أو فيها مراجعات مش طبيعية، أو غلاف وعنوان مش متناسب مع المحتوى، خلي بالك، ده ممكن يكون تسويق أسود. ده بيبقى مجرد فخ لشد انتباه القارئ من غير ما يقدم له حاجة قيمة في النهاية.
وطبعاً لكل قاعدة شواز، في أعمال بالفعل متعوب عليها وتستحق القراءة، ولكن احنا هنا بنتكلم على الأغلبية اللي بيتخذوا الاتجاه ده كوسيلة لترويج الأعمال الأدبية بشكل غير واقعي.
والخلاصة هنا إن النوع ده على الإغلب بيطلع شئ يختلف عن توقعات القارئ!
“لا تخافوا..ولكن احذروا.”
3- “زيت زي عبيد”
الرواية بتكون مليئة بالأفكار السطحية أو المكررة، مفيهاش تناول لفكرة معينة من زاوية مختلفة، أو فكرة جديدة خالص يتم طرحها للقُراء، النوع ده من الروايات بيكون نمطي جداً بنفس اسلوب السرد، والحبكة الدرامية، والنهايات المتوقعة.
إزاي تعرف النوع ده من الروايات؟
تكرار الأفكار النمطية: لو الرواية بتحكي عن مواضيع شائعة بشكل مكرر، من غير ما تضيف ليها طابع أو معالجة جديدة، زي مثلاً قصص الحب التقليدية أو الحروب بشكل سطحي، ده ممكن يكون دليلاً على إنها من النوع ده.حبكة درامية متوقعة: زي أن البطل في البداية يكون في مشكلة معينة، وبعد كده يواجه تحديات تنتهي بحل سهل أو تقليدي، ده بيكون مؤشر على أن الرواية مفيش فيها عنصر المفاجأة أو الابتكار.
– مراجعات القُراء: اقرأ مراجعات عنها على مواقع التواصل الاجتماعي أو من خلال مقالات ترشيحات الكتب اللي هنا.
– عادة النوع ده من الروايات بيكون عدد صفحاتها قليل.
ولكن النوع ده بيحبه نوع من القُراء اللي بتدور على حاجة خفيفة وبسيطة وتخلص بسرعة معاهم، وعادة معظمنا القٌراء بنحتاجه في الوقت اللي بيحصلنا فيه “بلوك قراءة”، بيكون مفيد لينا اننا نكسر روتين القراءة العميقة بحثاً عن السطحية والتكرار، فقد يكونوا ممتعين احياناً!
4- “ريش على مفيش”
ده مثل بيوصف عدم وجود نقد أو تحليل حقيقي لفكرة الرواية!
الرواية غلافها حلو وواصف الفكرة كويس، عنوانها جذاب بيتسم بالغموض وعمق الفكرة، ومش هننسى النبذة اللي هتحسسك إنك محتاج تفهم اكتر، بس الصدمة هنا إن الفكرة بتكون موجودة ولكن ناقصها جوانب كتير وتفاصيل وزوايا مفقودة، وبتحس في الآخر إنك قرأت نصف رواية مش رواية كاملة متكاملة!
إزاي تعرف النوع ده من الروايات؟
– التركيز على الأحداث بشكل سطحي: الرواية ممكن تركز على الأحداث بس من غير ما تشرح أو تناقش الأسباب أو التأثيرات. يعني القصة تمشي بسرعة من غير ما توضح دوافع الشخصيات أو التحديات اللي بيواجهوها.الشخصيات سطحية: الشخصيات لو كانت ساذجة أو واضحة زي “الطيبة جداً” أو “الشريرة جداً”، من غير ما يكون ليهم خلفيات معقدة أو مشاعر متداخلة، ده بيكون دليل على إن مافيش تحليل عميق للشخصيات.
أسلوب سرد بسيط أو مبالغ فيه: لو الأسلوب السردي في الرواية مباشر جداً أو الحوار فيها مبالغ فيه، ده معناه إن الكاتب مش مشغول بتقديم أفكار عميقة، مهتم أكتر إنه يحكي القصة بسرعة.الرسائل مش واضحة أو غامضة: لو الرسائل في الرواية مش واضحة أو مش معمولة بطريقة تخليك تفكر فيها بعمق، ممكن تكون الرواية مش معمولة تحليل صح.
مفيش اهتمام بالسياق الثقافي أو التاريخي: لو الرواية مش مهتمة بتوضيح تأثير البيئة أو التاريخ على الشخصيات أو الأحداث، يبقى دي غالباً رواية سطحية مش معمولة بناء على تفكير نقدي.
باختصار، النوع ده من الروايات بيكون كله حبكة وسرد للأحداث أكتر من ما يكون فيه أفكار عميقة أو تحليل للفكرة. ممكن تكون ممتعة للقراءة، بس مش هتلاقي فيها حاجة تخليك تتوقف وتفكر.
5- “سمك في مايه”
الكتاب مفيش فيه هدف واضح!
النوع ده من الروايات بيخلط بين الأحداث والشخصيات بدون تقديم هدف أو رسالة واضحة.
إزاي تعرف النوع ده من الروايات؟ ا– عدم وجود حبكة محورية: الرواية مش ماشية في اتجاه واحد واضح، وبتشمل أحداث متفرقة، وبالتالي مفيش دافع أو هدف يحرك الأحداث.
– الشخصيات بدون تطور: الشخصيات قد تكون موجودة بس مش بتتغير أو تتطور خلال الرواية، أو مش عندها دوافع واضحة للي بتعمله.
– نقص في التوجيه: ممكن تلاحظ إن الرواية مش بتحاول تخلق علاقة بين القارئ والمواقف أو الشخصيات، وبتسيبك في حالة من الضياع بدون إشارات واضحة.
– التشتيت في المواضيع: لو الرواية بتتناول مواضيع كتيرة بس بشكل سطحي من غير ربط بينها، ممكن تحس إنها مش بتركز على موضوع واحد أو فكرة معينة.
النوع ده من الروايات بيكون فيها شيء ما غير واضح أو بيحس القارئ فيها بعدم التوجيه، زي السمك اللي عايش في المية من غير ما يكون عنده نقطة واضحة أو هدف في الوجود، بنفس طريقة الرواية دي، بتكون في حالة من الوجود من غير ما توصل لغاية أو رسالة معينة.
والمثل ده بيحاول يعبر عن حالة عدم الاستقرار أو التوهان، وده اللي بتحس بيه لما تقرأ نوع من الروايات اللي مش واضحة في هدفها، لو لقيت الحاجات دي في رواية متكملهاش عشان هتسأل نفسك في الآخر إيه الهدف؟!
الحياة تجارب، واحنا القُراء بنشوف كل رواية حياة مختلفة عن غيرها..وبندخل في حيوات مختلفة ونطلع منها عايشين تجربة مميزة مع شخصيات مش هنقابلهم تاني، وزي ما قلنا الحياة تجارب، متزعلش على رواية قرأتها ومعجبتكش واعتبرها تجربة..
لو عجبك المقال دوس إعجاب وعشان يهمنا رأيك متنساش تكتب تعليقك الشخصي، بشكرك إنك وصلت لحد هنا وإلى اللقاء في مقال قادم.
on العلم المرحكتاب ممتع انصح به
on أحلام ممنوعةكتاب جميل جدا
on رفقاء الليلكتاب رائع- on انستا_حياة#كتاب رائع
- on أنت فليبدأ العبثكتاب رائع
