أحمد السقا بطل فيلم “أرض زيكولا”

“سأحتل أرض زيكولا من أجلك يا أسيل”

الجملة الأشهر في عالم الروايات اللي تصدرت في قائمة الكتب الأكثر مبيعاً لسنة 2015 وبوستات السوشيال ميديا مبطلتش كلام عنها في آخر كام سنة فاتوا، وزادت شهرتها في عالم الفانتازيا بعد صدور الجزء التاني منها “أماريتا” وبتتجدد معاها شهرتها مع الجيل الجديد،

وده اللي شجع الفنان أحمد السقا بتحويل رواية “أرض زيكولا” لعمل فني سينمائي من خلال إعلانه عن العمل بالتعاون مع المخرج أحمد خالد موسى ومؤلف الرواية الكاتب عمرو عبد الحميد وهيتم بالفعل بداية تصويره بعد نهاية شهر رمضان.

والجدير بالذكر إن ده مش أول تعاون ليهم مع بعض، قدم الفنان أحمد السقا والمخرج أحمد خالد موسى قبل كدة الحصان الأسود سنة 2017 و هروب اضطراري وكمان أخر مسلسل ليه في رمضان وهو “العتاولة”.

عن رواية “أرض زيكولا”

مدينة بتتعامل بعملة تانية غير الفلوس وهي وحدات الذكاء ، كل ما كنت أذكى كنت أغنى، الرواية هتخطفك من أول سطر لأخرها من غير ذرة ملل بصياغة جيدة ومتعة في الأحداث هتفكرك بأعمال الفانتازيا للعراب أحمد خالد توفيق ولكن بشكل عصري أكتر وخفيف بلغة سهلة وسرد مُبسط.

رواية “أرض زيكولا” هي رواية مُغامرات وتشويق من الدرجة الأولى.. رواية من النوع اللي هتحسسك إنك عايش جوه العالم اللي الكاتب رسمه بقلمه بدقة.

عن الشخصيات
بطل قصتنا هو “خالد حُسني” صاحب الـ28 سنة خريج كلية التجارة اللي مبيشتغلش بمؤهله زي المتعارف عليه في مجتمعنا وبيعيش مع جده حياة هادية وروتينية مع حبيبته “منى” زميلته في الجامعة واللي اتقدم عشان يخطبها 8 مرات.!

وعشان يثبت لباباها إنه بطل وجدير بيها قرر ينزل السرداب اللي جده بيحكيله عنه طول حياته حكايات الغريبة، منها  إن جواه جن وعفاريت ومنها إن في كنز جواه،
بس الحقيقة طلعت غير كده خالص…

رأي الجمهور
لاحظنا في آراء بعض الجمهور إن في خلاف مابين سن البطل الشاب “خالد” وسن الفنان أحمد السقا اللي شافوه مش مناسب مع عُمر بطل رواية أرض زيكولا.