رواية أنف وثلاث عيون بين الماضي والحاضر

القصة وما فيها:

الدكتور هاشم مش عايز يجيبها البر، بيحب 3 وعايزهم كلهم وبيخاف من الكوميتمنت ومش عايز أي التزامات أو مسؤوليات، وقع أمينة في حبه بالرغم من أنها متجوزه ونجوى كمان بتحبه بس بتحب فلوسه أكتر أما رحاب المتحررة اللي أتعرف عليها في البار أقنعته أنه يتقبل تعدد علاقتها زي ما هو متعدد العلاقات وقالت له “أنت كمان البوي فريند بتاعي!”

طريقة سرد الرواية:

قدرة إحسان عبد القدوس مبهرة وجديدة وممتعة قدر يوصف مشاعر كل شخصية بتحليل نفسي عميق وشرح لأبعاد الشخصية بأسلوب يسحبك عشان تعيش وتتفاعل مع الشخصيات، فترفض أفكارهم مرة، وتتقبلها مرة تستغرب من قيمهم الاجتماعية والأخلاقية، ولكن في كل الأحوال هتتوه مع الأنف والثلاث عيون.

فيلم أنف وثلاث عيون سنة 1972:

سنة 72 المخرج كمال حسين كمال والسيناريست مصطفى كامل عملوا معالجة درامية لرواية إحسان عبد القدوس “أنف وثلاث عيون” عشان تكون فيلم من بطولة محمود ياسين وماجدة الصباح ونجلاء فتحي مع ميرفت أمين، الفيلم وقتها أثار جدل كبير جداً بين النقاد والجمهور شافه إهانة لكبار الأمهات والآباء، ولكن صناع الفيلم كانوا بيتحايلوا على البعد الجنسي لموضوع الرواية، ولكن الفيلم كان أعمق من الصورة المنتشرة عنه، لأنه بيناقش مسألة ” الحب بيجي بالعشرة بعد الجواز، وأن كل إنسان مسؤول عن تصرفاته ومفيش ولا ضحية بين كل العلاقات المتشابكة في الفيلم، هتحتار في أمر نجوى هل هي فعلًا ضحية خالتها ولا أمينة ضحية انفصال أمها عن أبوها وهل رحاب كانت عارفة وقاصدة هي بتعمل إيه وتمردها على المجتمع بوصفه ” أهل الكهف” مع أنها تعتبر أكثر واحدة في الفيلم متصالحة مع نفسها، ومش بتلوم حد على اللي وصلت ليه ، والدكتور ممكن تشوفه أناني أو تايه مرة يحب واحدة ومرة يرفضها والكرما اللي حصلت معاه لما حب رحاب وقالتله أنا مش بتاعت جواز، في النهاية هتشوف فيلم بمعالجة قوية وعميقة لرواية بتوقيع إحسان عبدالقدوس.

فيلم أنف وثلاث عيون سنة 2023:

بعد 51 سنة من عرض فيلم “أنف وثلاث عيون” قرر السيناريست وائل حمدي يخوض مغامرة جديدة بمعالجة عصرية للرواية في فيلم من بطولة ظافر العابدين وأمينة خليل، صبا مبارك وسلمى أبو ضيف من إخراج أمير رمسيس، صرح حمدي لجريدة الشروق أن الفيلم يعتبر فصل جديد لرواية ” أنف وثلاث عيون”، وأنه ملوش علاقة بالفيلم اللي تم عرضه سنة 72، أضاف عن سؤاله في اختيار اسم الفيلم، أنه بيعتبره تخليد لذكرى إحسان عبدالقدوس و أبطال روايته.

تشوف الفيلم فين:

الفيلم حالياً بالسينمات المختلفة، إعلان الفيلم

استوقفني في نهاية المقالة قصيدة أبو تمام “نقل فؤادك حيث شئت من الهوى فما الحب إلا للحبيب المخلص” وأظن أنها أكثر قصيدة لايقه على الرواية، يمكن بنلف كتير في حياتنا وبنشوف ناس أكثر وبنحب وبنكره وبنبعد وبتنوجع بس دايماً بنرجع للحبيب المخلص.

فريق iRead كتب المقالة بكل الحب عشان يشجعك على القراءة بانتظام، أنت تستاهل أنك تثقف نفسك وتبسطها، شكراً لأنك وصلت لحد هنا.