تعلن مؤسسة iRead عن اطلاق النسخة الرابعة من فعاليات حفل توزيع جوائز iRead AWARDS 2023، تحت شعار #كلمات_كتبوها_عشانك، واللي هدفه السنة دي تشجيع “الكلمة” لأن الكتابة ليها أشكال كتير، بس التأثير هيفضل واحد، إنها تعبر عنك في الوقت اللي انت محتاجه.
عشان كده السنة دي فيه مسابقتين: مسابقة القصة القصيرة، ومسابقة تصويت الجمهور لإختيار أفضل كتاب، عمل أدبي صاعد، دار نشر، بالإضافة لأفضل صانع محتوى.
iRead AWARDS 2023 هو حدث بيضم مسابقات أدبية وفنية، وبيهدف لتكريم أكبر الأدباء وكمان الكُتاب الصاعدين، وتسليط الضوء على المواهب اللي لسة بتبدأ أول خطواتها في عالم الأدب والفن، وتقديم فرصة ليهم في مشوار حياتهم الأدبية والفنية، وتساعد الجمهور يعبر عن صوته ويختار مين كان الأفضل بالنسبة له في عالم الأدب والكتابة.
حفل توزيع جوائز iRead AWARDS 2023 هيكون في شهر نوفمبر بحضور أعضاء مجلس إدارة iRead، أعضاء لجنة التحكيم مسابقة القصة القصيرة، الفائزين في مسابقاتنا، أكبر الكُتاب والأدباء، دور النشر، والعديد من الشخصيات العامة.
تفاصيل أكتر عن المسابقات:
iRead AWARDS بتنقسم لمسابقتين، والفائزين في كل مسابقة هيتكرموا في الحفل النهائي.
المسابقات هي: مسابقة القصة القصيرة، ومسابقة تصويت الجمهور لإختيار الأفضل.
مسابقة تصويت الجمهور
صوت الجمهور هو التتويج الحقيقي لأي عمل ناجح أثر فينا والتصويت السنة دي أكبر من كل اللي فات!
مسابقة تصويت الجمهور لإختيار: أفضل كتاب، عمل أدبي صاعد، دار نشر، وأفضل صانع محتوى.
رتبنا كل الأسماء المرشحة في كل قسم بترتيب الحروف الأبجدية، عشان نسهل عليك الإختيار والتصويت!
هي مسابقة بتتعمل كل سنة لكتابة القصص القصيرة واكتشاف كُتاب صاعدين، ولجنة التحكيم بتقيم وتختار أفضل 10 قصص وهيتكرموا في حفل توزيع جوائز iRead AWARDS 23.
وزي ما احنا متعودين القصص دي بتتنشر والسنة دي الكتاب هيكون إلكتروني من إنتاج أعمال iRead الأصلية وحصريًا على أبلكيشن iRead eBooks أول أبلكيشن مصري للقراءة الإلكترونية.
ودي أسماء الكتب اللي أصدرناها لحد دلوقتي
2019 – “غموض في مصر القديمة” -كتاب ورقي
2020 – “ليالي الكورونا” – كتاب ورقي
2021 – “اليوم الأخير” – كتاب ورقي
2022 – كتاب “كانت هتفرق” – كتاب إلكتروني
وهو أول كتاب إلكتروني من إنتاج أعمال iRead الأصلية وموجود حصريًا على أبلكيشن iRead eBooks
2023 – هنصدر تاني كتاب إلكتروني على الأبلكيشن وهيكون حصري
موضوع القصة القصيرة في 2023
السنة دي موضوع القصة ليه أبعاد نفسية، وأحداثه بتدور جوة عيادة!
اكتب قصة من 3,000 كلمة عن زيارة مش عادية بيقوم بيها مريض أو مريضة لعيادة دكتور أمراض نفسية وعصبية، الزيارة دي بينتج عنها أحداث غير متوقعة خالص!
ممكن الزيارة دي تكون الأولى أو الأخيرة! وممكن تكون دراما، رعب، فانتازيا، أكشن، جريمة وغموض.. تقدر تتناول الزيارة من الجانب اللي تحبه بشرط الالتزام بالموضوع اللي حدنناه كحدث رئيسي للقصة.
“iRead” أكبر مجتمع عربي للقُراء والكُتاب. المؤسسة اللي وصلت لأكتر من مليون قارئ.
بدأت في 2019 بهدف واحد وهو إننا نعيد زمن القراءة أعظم وسيلة قدر بيها الإنسان ينقل معرفته جيل ورا جيل، وده من خلال مبادرات ومشاريع وأحداث تشجع القراءة والكٌتاب والثقافة بشكل عام.