مراجعة النُص المسلسل ولا الكتاب؟

من بداية الإعلان عن مسلسل النُص، وجمهور القُراء متحمس يشوف شخصية المعلم عبد العزيز النُص من كتاب “مذكرات نشال” على أرض الواقع، بيبدأ خيال القارئ يحلل ويقارن المشاهد، وطريقة الحوار، وحتى أسماء الشخصيات، وده لأن كل قارئ بيتخيل المشاهد والأبطال من وحي خياله، وفي مقالة النهاردة هنعمل مراجعة بسيطة على الكتاب والمسلسل، يلا بينا 

مراجعة كتاب ” مذكرات نشال”

الكتاب من تأليف أيمن عثمان وإصدار دار دون للنشر سنة 2023، بس حدوته الكتاب بدأت من قبل كده بكتير

الحكاية بتبدأ مع المعلم عبد العزيز النُص، أشهر نشال في التسعينيات، كتب مذكراته وراح للأستاذ حسني يوسف صاحب جريدة لسان الشعب، وطلب منه انه ينشر مذكراته زي ما نشر قبل كدا  مذكرات “الفتوة أبو الحجاج يوسف”، الأستاذ وافق وتم نشر مذكراته بالفعل. 

الكتاب اللي بيتكلم عن مغامرات النُص فى النشل والفلوس اللي سرقها، مين أساتذته فى المهنة وازاي بدأها وتوبته، النشل عالم كبير ليه قانون ونقابة وقاموس لغوي وأصول، الكاتب وضحها بطريقة سرد خفيفة وبسيطة وكوميدية، كمان الكتاب بيضم بعض الأخبار عن النشل والنشالين من المجالات القديمة.

يُصنف الكتاب من الكتب الخفيفة اللي تقدر تفصل بيها بين الروايات أو الكتب الكبيرة. 

صورة واقعية من مذكرات المعلم عبد العزيز النُص 

اقرأ الكتاب على iRead eBooks من هنا 

مراجعة مسلسل النُص 

صُناع العمل 

المسلسل  من إخراج حسام علي ومن بطولة أحمد أمين، أسماء أبو اليزيد، صدقي صخر وحمزة العيلي، وكتابه “عبد الرحمن جاويش، سارة هجرس، وجيه صبري” 

الأحداث: 

بتدور أحداث المسلسل في إطار تاريخي كوميدي عن عبد العزيز النُص، اللي بيتحول من مجرد نشال سمعته، لبطل شعبي، وده بعد تأسيسه حركة مقاومة وطنية ضد الإحتلال الإنجليزي. 

أجواء وحالة المسلسل 

أجواء المسلسل مأخوذه من ثلاثينيات القرن العشرين، وبتبدأ مع النُص، وهو شغال كمسري في مصلحة «التروماي»، وده بيوضح توبته عن النشل، وجدعنته لما خرج زميله في المصلحة من أزمة ممكن يقع فيها بسبب المنشورات اللي كانت في جيبه ضد الإنجليز، استخدم مهارته في النشل، وأنقذ بيها صديقه، لكن ده ميمعنش انه تحمس لما عرف ان فيه عمليه جديدة ومكسبها 80 كيلو دهب، المسلسل بينقلك لحقبة حقيقية بكل تفاصيلها عاشتها مصر، وشهدت شوارعها على كل اللي بيحصل، حتى على المعلم النُص. 

ليه النُص اسمه النُص؟ 

في سيناريو المسلسل قال أحمد أمين على لسان البطل المعلم عبد العزيز، انه اسمه النُص عشان بيقطم في نص الكلام. 

تقييم المشاهدين للمسلسل

أغلب المشاهدين قالو “المسلسل جميل وأداء الممثلين راقي، وخالي من الألفاظ وأنه رجعهم لزمن الفن الجميل” 

الجدير بالذكر ان في نهاية كل حلقة بيقدم معلومات تاريخية مهمة

صور من كواليس مسلسل النُص

قولنا ايه اللي عجبك أكثر، الكتاب ولا المسلسل؟